Qeydə alınmış namizəd

Qeydə alınmış namizəd — qanunvericilikdə tərifi

1.1.15. qeydə alınmış namizəd — Azərbaycan Respublikası Milli Məclisinin deputatı, Azərbaycan Respublikasının Prezidenti, bələdiyyələrə üzv seçilmək üçün bu Məcəlləyə uyğun olaraq qeydə alınmış şəxs; …

Qeydə alınmış namizəd nə deməkdir?

Namizəd imza vərəqələrini və digər sənədləri təqdim etdikdən sonra müvafiq seçki komissiyası 7 gün müddətində onun qeydə alınıb-alınmaması barədə əsaslandırılmış qərar qəbul edir (Seçki Məcəlləsi, maddə 60.1). İmza toplanması zamanı qanuni qadağaların pozulması, sənədlərin olmaması və ya düzgün rəsmiləşdirilməməsi, məlumatların düzgün olmaması və etibarlı imzaların lazımi saydan az olması qeydiyyatdan imtina üçün əsas ola bilər (Seçki Məcəlləsi, maddə 60.2).

Qeydə alınmış namizəd seçkiqabağı təşviqat aparmaq hüququ qazanır və xüsusi təminatlardan istifadə edir. Ərizəsinə əsasən o, ödənilməyən məzuniyyət verilməklə işdən azad edilməli, bu dövr üçün ona orta aylıq əmək haqqı məbləğində, lakin minimum əmək haqqının 20 mislindən çox olmayan haqq ödənilməlidir (Seçki Məcəlləsi, maddə 70.1). Bu müddətdə o, vəzifəli şəxslərin təşəbbüsü ilə işdən çıxarıla və ya razılığı olmadan başqa işə keçirilə bilməz (Seçki Məcəlləsi, maddə 70.3). Milli Məclisə seçkilərdə qeydə alınmış namizəd yalnız Baş prokurorun razılığı ilə məsuliyyətə cəlb edilə bilər (Seçki Məcəlləsi, maddə 151).