Baş prokuror

Baş prokuror — qanunvericilikdə tərifi

Azərbaycan Respublikasının Prokurorluğuna Azərbaycan Respublikası Konstitusiyasının 133-cü maddəsinin III hissəsinə uyğun olaraq vəzifəyə təyin və vəzifədən azad edilən Azərbaycan Respublikasının Baş prokuroru rəhbərlik edir (bundan sonra – "Baş prokuror").

Baş prokuror nə deməkdir?

Baş prokuroru Prezident Milli Məclisin razılığı ilə vəzifəyə təyin və vəzifədən azad edir, onun müavinlərini isə Baş prokurorun təqdimatı ilə Prezident təyin edir (Konstitusiya, maddə 133). Baş prokuror prokurorluq orqanlarına rəhbərlik edir, onların fəaliyyətini təşkil edir, ərazi və ixtisaslaşdırılmış prokurorları Prezidentin razılığı ilə, digər prokurorluq işçilərini isə öz səlahiyyəti ilə vəzifəyə təyin və vəzifədən azad edir (Prokurorluq haqqında Qanun, maddə 10).

Baş prokuror Ali Məhkəmə Plenumunun iclaslarında iştirak edir, əlavə kassasiya qaydasında baxılması üçün protest verir, deputatların toxunulmazlığına xitam məsələsinə dair təqdimat verir, hakimlər barəsində cinayət təqibinə razılıq üçün Məhkəmə-Hüquq Şurasına təqdimat verir, Konstitusiya Məhkəməsinə sorğu verir və icrası prokurorluq işçiləri üçün məcburi olan əmr və göstərişlər verir (Prokurorluq haqqında Qanun, maddə 10). Onun özünə münasibətdə tutma, həbs və axtarış kimi hərəkətlər yalnız Ali Məhkəmə Plenumunun razılığı ilə mümkündür (Prokurorluq haqqında Qanun, maddə 33).