Əlavə kassasiya

Əlavə kassasiya — qanunvericilikdə tərifi

Azərbaycan Respublikası Ali Məhkəməsi Mülki kollegiyasının və Kommersiya kollegiyasının qərarlarına təqdimat, şikayət və ya protestlə Azərbaycan Respublikası Ali Məhkəməsinin Plenumunda əlavə kassasiya qaydasında yenidən baxıla bilər.

Əlavə kassasiya nə deməkdir?

Plenum şikayət, ərizə və ya protestə yazılı icraat qaydasında baxır (Mülki Prosessual Məcəllə, maddə 422). Şikayəti işdə vəkillə iştirak edən şəxs verir (Mülki Prosessual Məcəllə, maddə 423.1) və şikayət onu tərtib etmiş vəkil tərəfindən də imzalanmalıdır (Mülki Prosessual Məcəllə, maddə 423.5). İşə cəlb olunmayan, lakin məhkəmə aktı ilə maraqlarına toxunulan şəxslər ərizə ilə müraciət edir (Mülki Prosessual Məcəllə, maddə 423.2).

Şikayət və ya protest məhkəmə aktı rəsmi qaydada verildiyi gündən 2 ay müddətində verilir (Mülki Prosessual Məcəllə, maddə 423.4). Plenum müstəsna olaraq hüquqi məsələlər üzrə işlərə baxır (Mülki Prosessual Məcəllə, maddə 424.1). Ləğv əsaslarına qərarın Konstitusiya Məhkəməsinin Konstitusiyaya uyğunsuz hesab etdiyi normaya əsaslanması, işə cəlb olunmamış şəxslərin hüquqlarının pozulması, qərarın nəticə hissəsinin təsviri və ya əsaslandırıcı hissəsinə uyğun olmaması, məhkəmə aidiyyəti qaydalarının pozulması və məhkəmə təcrübəsinin vahidliyinin pozulması aiddir (Mülki Prosessual Məcəllə, maddə 424.2).