Məxfilik Siyasəti

Bu Məxfilik siyasəti qanuntestleri.com saytında və onun tətbiq kimi quraşdırılan versiyasında (bundan sonra — «Platforma») fərdi məlumatlarınızın hansı məqsədlə toplandığını, necə istifadə edildiyini, saxlanıldığını və qorunduğunu izah edir. Siyasət «Fərdi məlumatlar haqqında» Azərbaycan Respublikasının Qanununa və qüvvədə olan digər qanunvericilik aktlarına uyğun hazırlanıb.

Platformada qeydiyyatdan keçməklə və ya ondan istifadə etməklə bu siyasətlə tanış olduğunuzu və fərdi məlumatlarınızın burada göstərilən qaydada emalına razılıq verdiyinizi təsdiq edirsiniz.

Məlumatları kim emal edir

Platformanı idarə edən qanuntestleri.com komandası (bundan sonra — «biz») toplanan fərdi məlumatların mülkiyyətçisi və operatorudur. Məlumatların emalı ilə bağlı bütün suallar üzrə «Texniki dəstək» səhifəsi vasitəsilə bizimlə əlaqə saxlaya bilərsiniz.

Hansı məlumatları toplayırıq

• Hesab məlumatları: ad, soyad, e-poçt ünvanı, istifadəçi adı və şifrə (şifrə yalnız geri çevrilməyən şifrələnmiş formada saxlanılır), istəyə bağlı olaraq mobil telefon nömrəsi, profil şəkli və hazırlaşdığınız istiqamət. «Google ilə daxil ol» seçimindən istifadə etdikdə — Google-un bizə ötürdüyü ad, e-poçt ünvanı və profil şəkli.
• Təhsil fəaliyyəti: testlərdəki cavablarınız və nəticələriniz, sərf etdiyiniz vaxt, sınaq imtahanları, oxuduğunuz dərslər, kartlar üzrə təkrar cədvəli, seçilmişlər və qeydlər, səhv jurnalı, imtahan təqvimindəki qeydlər, «Hazırlıq planı»nın ayarları (imtahan tarixi və adı, dərs günləri, gündəlik vaxt) və plandakı işarələnmiş tapşırıqlar, qazandığınız xallar, rozetlər və reytinqdəki yeriniz.
• Abunə və sifariş məlumatları: seçdiyiniz paket, sifariş nömrəsi, məbləğ, ödənişin tarixi və statusu, abunəliyin başlanğıc və bitmə tarixləri, sifarişdə göstərdiyiniz ad və əlaqə məlumatları.
• Dəstək müraciətləri: «Texniki dəstək» forması ilə göndərdiyiniz ad, soyad, e-poçt ünvanı, telefon nömrəsi, mövzu, mesaj, istəyə bağlı əlavə etdiyiniz ekran şəkli, problemin olduğu səhifənin ünvanı, sifariş nömrəsi və seçdiyiniz cavab kanalı (e-poçt, WhatsApp və ya zəng). Müraciətə brauzer, əməliyyat sistemi və cihaz haqqında texniki məlumat (cihazın növü, ekran ölçüsü, dil, saat qurşağı, IP ünvanı) avtomatik əlavə olunur; hesaba daxil olmusunuzsa — həmçinin hesab və abunə məlumatları (hesab nömrəsi, abunənin vəziyyəti və bitmə tarixi, hazırlıq istiqaməti, son dərs və testlər, son sifarişlər). Bu, problemi sizdən təkrar soruşmadan tez həll etməyə kömək edir.
• «Səhv var» bildirişləri: test sualında, dərsdə və ya kartda səhv bildirdikdə seçdiyiniz mətn parçası, səbəb, şərhiniz və səhifənin ünvanı. Hesaba daxil olmusunuzsa, bildiriş hesabınıza bağlanır; qonaq kimi göndərsəniz, e-poçt ünvanı istəyə bağlıdır və yalnız düzəliş barədə xəbər vermək üçün istifadə olunur. Təkrar və spam göndərişlərin qarşısını almaq üçün IP ünvanı yalnız geri çevrilməyən şifrələnmiş (heş) formada saxlanılır.
• İctimai yazılar: forumda dərc etdiyiniz mövzular, cavablar və şərhlər.
• Texniki məlumatlar: IP ünvanı, brauzer və cihazın növü, giriş vaxtı, aktiv sessiyalar, xəta qeydləri, kukilər və brauzerin yerli yaddaşında saxlanan parametrlər.

Xüsusi kateqoriyalı fərdi məlumatlar (irqi və ya etnik mənsubiyyət, dini və siyasi baxışlar, sağlamlıq və s.) tələb etmirik. Belə məlumatları forum yazılarında və müraciətlərdə paylaşmamağınızı xahiş edirik.

Məlumatlardan nə üçün istifadə edirik

• hesabınızı yaratmaq, sizi tanımaq və Platformaya girişi təmin etmək;
• testləri, sınaq imtahanlarını, dərsləri və digər xidmətləri göstərmək, irəliləyişinizi saxlamaq;
• nəticələrinizə əsasən fərdi analiz, təkrar cədvəli və tövsiyələr hazırlamaq;
• abunəliyi aktivləşdirmək, ödənişləri və sifarişləri qeydə almaq;
• xidməti bildirişlər göndərmək: qeydiyyat və ödəniş təsdiqi, tamamlanmamış ödəniş və abunəliyin bitməsinə dair xatırlatmalar, reytinq mükafatları və müraciətlərinizə cavablar;
• dəstək müraciətlərinə və «Səhv var» bildirişlərinə baxmaq, seçdiyiniz kanalla (e-poçt, WhatsApp və ya zəng) cavab vermək, bildirilən səhvi düzəldib sizə xəbər vermək;
• hesabın təhlükəsizliyini qorumaq: eyni anda aktiv sessiyaların sayını məhdudlaşdırmaq, şübhəli qeydiyyat və giriş cəhdlərinin, xallar sistemində saxtakarlığın qarşısını almaq;
• Platformanın işini ümumiləşdirilmiş statistika əsasında təhlil etmək və təkmilləşdirmək;
• qanunvericilikdən irəli gələn öhdəlikləri yerinə yetirmək.

Telefon nömrəsi istəyə bağlıdır. Onu qeydiyyatda, «Hesabım → Hesab məlumatları» bölməsində və ya dəstək müraciətində yazdıqda yalnız müraciətiniz və ödənişlə bağlı məsələlərdə sizinlə zəng və ya WhatsApp vasitəsilə əlaqə saxlamaq üçün istifadə edirik; reklam zəngləri və mesajları göndərmirik. Nömrəni istənilən vaxt həmin bölmədə dəyişə və ya silə bilərsiniz.

Məlumatlarınızı satmırıq, icarəyə vermirik və razılığınız olmadan reklam məqsədilə üçüncü şəxslərə ötürmürük. Reklam xarakterli məktublar yalnız buna razılıq verdikdə göndərilə bilər və hər məktubda imtina imkanı olur.

Emalın hüquqi əsası

• Razılığınız — qeydiyyat, «Google ilə daxil ol», «Texniki dəstək» forması, «Səhv var» bildirişi və ya sifariş zamanı verdiyiniz razılıq.
• Xidmət müqaviləsinin icrası — «İstifadə qaydaları» əsasında seçdiyiniz xidməti, o cümlədən ödənişli abunəni göstərmək üçün zəruri olan məlumatlar.
• Qanuni öhdəliklər — məsələn, ödənişlərin mühasibat və vergi uçotu.

Razılığınızı istənilən vaxt geri götürə bilərsiniz. Bu, geri götürülənədək aparılmış emalın qanuniliyinə təsir etmir. Xidmətin göstərilməsi üçün zəruri olan məlumatlara razılığın geri götürülməsi hesabın bağlanması ilə nəticələnə bilər.

Kukilər, yerli yaddaş və analitika

Kuki (cookie) sayta daxil olduqda brauzerinizdə saxlanılan kiçik mətn faylıdır. Platformada aşağıdakı növlərdən istifadə olunur:

• Zəruri kukilər — hesaba giriş, sessiyanın qorunması, səbət və ödəniş prosesi üçün. Onlarsız Platforma düzgün işləmir.
• Funksional kukilər və yerli yaddaş — seçimlərinizi (məsələn, mətnin ölçüsü, pleyerin parametrləri), günün sualı və pulsuz nümunə limitlərini, bildirişlərin nə qədər tez-tez göstərildiyini yadda saxlamaq üçün. Platforma tətbiq kimi quraşdırıldıqda bəzi səhifələr oflayn istifadə üçün cihazınızda saxlanıla bilər.
• Analitika — saytdan necə istifadə olunduğunu ümumiləşdirilmiş şəkildə anlamaq üçün. Bu məqsədlə üçüncü tərəfin analitika xidmətlərindən istifadə oluna bilər.
• Reklam kukiləri — abunəsi olmayan istifadəçilərə reklam göstərilə bilər; reklam tərəfdaşları (məsələn, Google) reklamı göstərmək və ölçmək üçün öz kukilərindən istifadə edə bilər. Abunəçilər üçün Platforma reklamsızdır.

Kukiləri brauzerinizin ayarlarından silə və ya bloklaya bilərsiniz. Zəruri kukiləri bloklasanız, hesaba daxil olmaq və ödəniş etmək mümkün olmayacaq. Fərdiləşdirilmiş reklamı Google hesabınızın reklam ayarlarından söndürə bilərsiniz.

Ödənişlər və kart məlumatları

Abunə və digər alışların ödənişi bank kartı ilə, ödəniş xidməti təminatçısı (hazırda — Epoint) və bank vasitəsilə həyata keçirilir. Kart məlumatlarını (kart nömrəsi, istifadə müddəti, CVV/CVC kodu) ödəniş xidmətinin qorunan səhifəsində daxil edirsiniz: bu məlumatlar bizim serverlərimizə ötürülmür və Platformada saxlanılmır.

Ödəniş təminatçısı bizə yalnız əməliyyatın nəticəsini, məbləğini, tarixini və identifikatorunu bildirir. Kart məlumatlarını ödəniş təminatçısı və bank öz qaydalarına və ödəniş kartları sənayesinin təhlükəsizlik standartlarına uyğun emal edir.

Ödəniş xatırlatmaları

Sifariş yaradıb ödənişi tamamlamadıqda (məsələn, ödəniş səhifəsi bağlandı və ya kart qəbul olunmadı) sifarişdə göstərilən e-poçt ünvanına ən çox iki xatırlatma məktubu göndərə bilərik — sifariş yaradılandan təxminən 1 saat və 24 saat sonra. Məktubda sifarişin tərkibi, məbləği və «Ödənişi tamamla» keçidi olur. Sifariş artıq ödənilibsə, ləğv olunubsa, aktiv abunəniz varsa və ya sonradan yeni sifariş vermisinizsə, xatırlatma göndərilmir.

Xatırlatmalardan hər məktubun sonundakı imtina keçidini açıb imtinanı təsdiqləməklə (və ya poçt proqramınızın «abunəlikdən çıx» düyməsi ilə) və yaxud «Hesabım → Hesab məlumatları» bölməsində müvafiq seçimin işarəsini götürməklə imtina edə bilərsiniz. İmtina sifariş təsdiqi, abunə və dəstək cavabları kimi vacib xidməti məktublara təsir etmir.

Məlumatları kimlə bölüşürük

Məlumatlarınıza yalnız xidməti göstərmək üçün zəruri olan həcmdə və yalnız aşağıdakı şəxslər çıxış əldə edə bilər:

• texniki xidmət təminatçıları — hostinq, e-poçt göndərişi, ehtiyat nüsxələrin saxlanması; onlar məlumatlardan yalnız bizim tapşırığımızla və məxfilik şərti ilə istifadə edir;
• ödəniş xidməti təminatçısı və bank — ödənişin həyata keçirilməsi üçün;
• Google — «Google ilə daxil ol» seçimindən istifadə etdikdə, habelə analitika və reklam xidmətləri çərçivəsində;
• dövlət orqanları — yalnız qanunvericilikdə nəzərdə tutulmuş hallarda və qaydada, səlahiyyətli orqanın sorğusu əsasında.

Bəzi xidmət təminatçılarının serverləri Azərbaycan Respublikasından kənarda yerləşə bilər. Belə hallarda məlumatların ötürülməsi qanunvericiliyin tələblərinə uyğun və yalnız bu siyasətdə göstərilən məqsədlər üçün həyata keçirilir.

Başqalarına görünən məlumatlar

• Reytinq: cədvəldə adınız qısaldılmış formada (ad və soyadın baş hərfi), profil şəkliniz, rütbəniz və xallarınız göstərilir; e-poçt ünvanı heç vaxt göstərilmir. Hesabınızda «Reytinqdə görünmə (anonim)» seçimini aktiv etsəniz, reytinq cədvəlində görünmürsünüz — bu halda aylıq mükafatlarda da iştirak etmirsiniz.
• Forum: forum oxumaq üçün hamıya açıqdır — dərc etdiyiniz mövzu, cavab və şərhlər, onların yanında adınız və profil şəkliniz qeydiyyatdan keçməmiş ziyarətçilərə də görünür və axtarış sistemlərinin (məsələn, Google) nəticələrində göstərilə bilər. E-poçt ünvanınız forumda heç vaxt göstərilmir. Mövzu açmaq, cavab yazmaq və bəyənmək üçün hesaba daxil olmaq lazımdır. Forumda telefon nömrəsi, ünvan və digər şəxsi məlumatlar paylaşmayın.

Dəstək müraciətləriniz və «Səhv var» bildirişləriniz ictimai dərc olunmur — onları yalnız siz (Hesabım → Müraciətlərim) və Platformanın səlahiyyətli əməkdaşları görür. Test nəticələriniz, analiziniz, ödənişləriniz və digər məlumatlarınız da yalnız sizə görünür (aşağıda təsvir olunan təqvim linkini özünüz yaratdıqda — həmin linklə açılan hazırlıq planı istisna olmaqla).

Hazırlıq planının təqvim linki. Analiz bölməsində «Təqvimə abunə ol» seçdikdə yalnız sizə məxsus gizli link yaradılır. Bu linki əlavə etdiyiniz təqvim xidməti (məsələn, Google Calendar və ya Apple Təqvim) hazırlıq planınızı — günlərin tapşırıqlarını, dərs və test adlarını, imtahan tarixini və adını, tapşırığın edilib-edilmədiyini — hesaba daxil olmadan, mütəmadi olaraq oxuyur və bu məlumatı öz məxfilik qaydalarına uyğun emal edir. Linki əldə edən istənilən şəxs də planı görə bilər, ona görə onu başqaları ilə paylaşmayın. «Linki yenilə» düyməsi ilə yeni link yaradılır və köhnə link dərhal işləməz olur. Yüklədiyiniz .ics faylı isə yalnız cihazınızda qalır.

Saxlama müddəti

• Hesab və təhsil məlumatları — hesabınız mövcud olduğu müddətdə. Abunəliyin bitməsi hesabı silmir: nəticələriniz və analiziniz yenidən abunə olduqda davam etməyiniz üçün qalır.
• Hesab silindikdən sonra — məlumatlar adətən 30 gün ərzində silinir və ya şəxsiyyəti müəyyən etməyə imkan verməyən formaya salınır; ehtiyat nüsxələrdən isə onların növbəti yenilənmə dövründə çıxarılır.
• Ödəniş və sifariş qeydləri — mühasibat və vergi qanunvericiliyinin tələb etdiyi müddət ərzində.
• Dəstək müraciətləri, ekran şəkilləri və «Səhv var» bildirişləri — müraciətə baxılması və mümkün təkrar suallar üçün zəruri olan müddətdə. Hesab silindikdə onlar hesabdan ayrılır (yazışma tarixçəsi qonaq müraciəti kimi qalır, səhv bildirişlərindən ad və e-poçt silinir).
• Texniki qeydlər — təhlükəsizlik məqsədilə qısa müddət, adətən bir neçə ay.

Hüquqlarınız

«Fərdi məlumatlar haqqında» Qanuna əsasən siz aşağıdakı hüquqlara maliksiniz:

• fərdi məlumatlarınızın emal olunub-olunmadığını, hansı məqsədlə və hansı əsasla emal edildiyini bilmək;
• məlumatlarınızla tanış olmaq və onların surətini almaq;
• səhv və ya natamam məlumatların düzəldilməsini, yenilənməsini tələb etmək;
• məlumatların silinməsini və ya emalın məhdudlaşdırılmasını (bloklanmasını) tələb etmək;
• emala verdiyiniz razılığı geri götürmək;
• reklam xarakterli bildirişlərdən imtina etmək;
• hüquqlarınızın pozulduğunu hesab etdikdə müvafiq dövlət orqanına və ya məhkəməyə müraciət etmək.

Ad, soyad, e-poçt ünvanı və şifrəni «Hesabım → Hesab məlumatları» bölməsində özünüz dəyişə bilərsiniz. Digər hüquqlardan istifadə etmək və ya hesabın silinməsini istəmək üçün «Texniki dəstək» səhifəsi vasitəsilə, qeydiyyatda göstərdiyiniz e-poçt ünvanı ilə müraciət edin. Kimliyinizi təsdiq etdikdən sonra müraciətinizə qanunvericilikdə müəyyən olunmuş müddətdə cavab veririk.

Məlumatların təhlükəsizliyi

Məlumatlarınızı icazəsiz girişdən, itirilmədən və dəyişdirilmədən qorumaq üçün təşkilati və texniki tədbirlər görürük:

• sayt ilə brauzeriniz arasındakı əlaqə HTTPS ilə şifrələnir;
• şifrələr açıq mətn şəklində saxlanılmır;
• idarəetmə panelinə giriş məhdud sayda səlahiyyətli şəxsə verilir; onlar məlumatlara yalnız texniki dəstək, təhlükəsizlik və müraciətlərin həlli üçün zəruri olduqda baxır;
• dəstək müraciətlərinə əlavə etdiyiniz ekran şəkilləri açıq ünvanda saxlanılmır — onları yalnız siz və səlahiyyətli əməkdaşlar imzalı keçidlə aça bilər;
• eyni anda aktiv sessiyaların sayı məhdudlaşdırılır, şübhəli fəaliyyət izlənilir;
• məlumatların ehtiyat nüsxələri mütəmadi olaraq çıxarılır.

İnternet vasitəsilə ötürmənin heç bir üsulu tam təhlükəsiz deyil. Şifrənizi heç kimlə bölüşməyin, hər sayt üçün ayrıca şifrə seçin və hesabınızda şübhəli fəaliyyət görsəniz, şifrəni dərhal dəyişib bizə xəbər verin.

Uşaqların məlumatları

Platforma peşəkar hüquq imtahanlarına hazırlaşan yetkinlik yaşına çatmış şəxslər üçün nəzərdə tutulub. 18 yaşına çatmamış şəxslər Platformadan yalnız valideynlərinin və ya digər qanuni nümayəndələrinin razılığı ilə istifadə edə bilər. Qanuni nümayəndənin razılığı olmadan azyaşlıya aid məlumatın toplandığını aşkar etsəniz, «Texniki dəstək» səhifəsi vasitəsilə bizə yazın — həmin məlumatları silərik.

Siyasətə dəyişikliklər

Bu siyasəti Platformanın imkanları və ya qanunvericilik dəyişdikcə yeniləyə bilərik. Son redaksiyanın tarixi səhifənin yuxarısında göstərilir. Əhəmiyyətli dəyişikliklər barədə saytda və ya e-poçt vasitəsilə əvvəlcədən məlumat veririk. Dəyişiklikdən sonra Platformadan istifadəni davam etdirməyiniz yenilənmiş siyasəti qəbul etdiyiniz mənasına gəlir.

Əlaqə

Fərdi məlumatlarınızla bağlı sual, müraciət və şikayətlərinizi «Texniki dəstək» səhifəsi vasitəsilə göndərin. Müraciətdə qeydiyyatda istifadə etdiyiniz e-poçt ünvanını göstərin — bu, sizi tez tanımağımıza və cavabı gecikdirməməyə kömək edir.

Əlaqəli sənədlər: «İstifadə qaydaları», «Müəllif hüquqları».