Seçki komissiyası

Seçki komissiyası — qanunvericilikdə tərifi

1.1.4. seçki (referendum) komissiyası — bu Məcəllə ilə nəzərdə tutulan qaydada formalaşdırılan və seçkilərin (referendumun) keçirilməsini təşkil edən və təmin edən kollegial orqan; …

Seçki komissiyası nə deməkdir?

Seçki komissiyaları üç pilləli sistem təşkil edir: Mərkəzi Seçki Komissiyası, dairə seçki komissiyaları və məntəqə seçki komissiyaları (Seçki Məcəlləsi, maddə 18.1). Onların işinə Mərkəzi Seçki Komissiyası rəhbərlik edir (Seçki Məcəlləsi, maddə 18.2), komissiyalar isə, bəzi məntəqə komissiyaları istisna olmaqla, daimi fəaliyyət göstərən dövlət orqanlarıdır (Seçki Məcəlləsi, maddə 18.3). Komissiyalar seçkilərin hazırlanmasını və keçirilməsini, nəticələrin müəyyən edilməsini və vətəndaşların seçki hüquqlarının müdafiəsini təmin edir (Seçki Məcəlləsi, maddə 17.2).

Komissiyalar dövlət orqanlarından, siyasi partiyalardan və digər təşkilatlardan asılı deyil (Seçki Məcəlləsi, maddə 17.3), səlahiyyətləri daxilində qəbul etdikləri qərarlar dövlət orqanları, namizədlər, siyasi partiyalar, vəzifəli şəxslər və seçicilər üçün məcburidir (Seçki Məcəlləsi, maddə 17.4). Onlar kollegial formada işləyir (Seçki Məcəlləsi, maddə 19.1), iclas həlledici səs hüquqlu üzvlərin 2/3 hissəsi iştirak etdikdə səlahiyyətlidir (Seçki Məcəlləsi, maddə 19.10). Seçki komissiyalarının səlahiyyət müddəti 5 ildir (Seçki Məcəlləsi, maddə 23.1).