Referendum

Referendum — qanunvericilikdə tərifi

1.1.1. referendum — Azərbaycan Respublikasının Konstitusiyası ilə müəyyən edilən məsələlər üzrə Azərbaycan Respublikası vətəndaşlarının səsverməsi; …

Referendum nə deməkdir?

Referendum vətəndaşların Konstitusiya ilə müəyyən edilmiş məsələləri bilavasitə səsvermə yolu ilə həll etməsidir. Referenduma çıxarılan məsələlər Konstitusiya ilə müəyyən edilir (Seçki Məcəlləsi, maddə 117), bəzi məsələlərin isə referenduma çıxarılmasına yol verilmir (Seçki Məcəlləsi, maddə 118). Konstitusiyada göstərilən bəzi məsələlər üzrə referendum keçirilməsi məcburidir (Seçki Məcəlləsi, maddə 7.2), qanunvericilik və icra hakimiyyəti orqanlarının həmin məsələyə dair qərar qəbul etməsi referendumu istisna etmir (Seçki Məcəlləsi, maddə 120).

Vətəndaşlar referendumda ümumi, bərabər və birbaşa seçki hüququ əsasında gizli və şəxsi səsvermə ilə iştirak edirlər (Seçki Məcəlləsi, maddə 2.1). Seçkilər referendumla eyni gündə keçirilə bilməz (Seçki Məcəlləsi, maddə 2.4). Konstitusiyada göstərilən bəzi məsələlər üzrə vahid seçici siyahısındakı seçicilərin 25 faizindən azı iştirak etdikdə referendum baş tutmamış sayılır (Seçki Məcəlləsi, maddə 139.1). Referendumla qəbul edilmiş akt qətidir, bütün ərazidə məcburidir və yalnız referendum yolu ilə ləğv edilə və ya dəyişdirilə bilər (Seçki Məcəlləsi, maddə 142).