Seçki dairəsi

Seçki dairəsi — qanunvericilikdə tərifi

1.1.5. seçki dairəsi — qeydə alınmış seçicilərin hər hansı seçkili orqana nümayəndə (nümayəndələr) seçməsi üçün bu Məcəlləyə uyğun olaraq təşkil edilmiş ərazi vahidi; …

Seçki dairəsi nə deməkdir?

Mərkəzi Seçki Komissiyası hər 5 ildən bir seçicilərin sayına dair məlumatlar əsasında 125 seçki dairəsi yaradır. Dairələr, bir qayda olaraq, seçicilərin orta təmsilçilik norması əsasında yaradılır; bu norma qeydə alınmış seçicilərin ümumi sayının 125-ə bölünməsi ilə müəyyənləşdirilir. Milli Məclis seçkilərində bu dairələr birmandatlı dairələr, digər seçkilərdə və referendumda isə seçki əraziləri sayılır (Seçki Məcəlləsi, maddə 29.1). Prezident seçkilərində və referendumda vahid seçki dairəsi bütün ölkəni əhatə edir (Seçki Məcəlləsi, maddə 29.9).

Dairələrdə seçicilərin sayı təqribən bərabər olmalı, orta normadan kənarlaşma bir qayda olaraq 5 faizi, ucqar yerlərdə isə 10 faizi keçməməlidir (Seçki Məcəlləsi, maddə 29.3.1). Seçicilərin müəyyən qrupunun çoxluq təşkil etməsi naminə dairə sərhədlərinin məqsədli müəyyən edilməsinə yol verilmir (Seçki Məcəlləsi, maddə 29.3.3). Seçki məntəqələrinin sərhədləri seçki dairələrinin sərhədlərini pozmamalıdır (Seçki Məcəlləsi, maddə 35.3.2).