Kollektiv əmək mübahisəsi

Kollektiv əmək mübahisəsi — qanunvericilikdə tərifi

14. Kollektiv tələblər – kollektiv müqavilələrin, sazişlərin bağlanması, onlara dəyişikliklərin edilməsi və icrası, habelə digər əmək, sosial və iqtisadi məsələlərlə bağlı işçilərin, ya da həmkarlar ittifaqları orqanının işəgötürən, onların birlikləri və ya müvafiq icra hakimiyyəti orqanları qarşısında irəli sürdüyü tələblərdir.

15. Kollektiv əmək mübahisəsi – kollektiv tələblərdən törəyən fikir ayrılığıdır.

Kollektiv əmək mübahisəsi nə deməkdir?

Kollektiv əmək mübahisəsi fərdi mübahisədən fərqli olaraq ayrıca işçinin deyil, işçilər qrupunun və ya həmkarlar ittifaqının maraqlarına aiddir. Onun tərəfləri işəgötürənlər, işçilər (əmək kollektivi və ya onun bir hissəsi) və ya həmkarlar ittifaqlarıdır (Əmək Məcəlləsi, maddə 261). Mübahisə kollektiv danışıqların aparılması, kollektiv müqavilə və sazişlərin bağlanması, dəyişdirilməsi və icrası ilə bağlı yarana bilər (Əmək Məcəlləsi, maddə 260).

Kollektiv müqavilə və sazişlərin icra edilməməsi, habelə digər əmək və sosial məsələlərlə bağlı kollektiv tələblər işçilərin və ya həmkarlar ittifaqı təşkilatının ümumi yığıncağında (konfransında) irəli sürülür (Əmək Məcəlləsi, maddə 262). Mübahisə barışdırıcı üsullarla, yəni razılaşdırıcı komissiyada, vasitəçinin iştirakı ilə və ya əmək arbitrajında (Əmək Məcəlləsi, maddə 265), habelə tətil vasitəsilə həll olunur (Əmək Məcəlləsi, maddə 264). Mübahisənin yaranması və tətil keçirilməsi ilə əlaqədar işçilərin işdən çıxarılması qadağandır (Əmək Məcəlləsi, maddə 270).