İttiham tərəfi

İttiham tərəfi — qanunvericilikdə tərifi

ittiham tərəfi — birlikdə götürülmüş təhqiqatçı, müstəntiq, prokuror, həmçinin zərər çəkmiş şəxs, xüsusi ittihamçı, mülki iddiaçıdır; …

İttiham tərəfi nə deməkdir?

İttiham tərəfi cinayət prosesinin iki tərəfindən biridir. Ona həm dövlət adından cinayət təqibini aparan vəzifəli şəxslər — təhqiqatçı, müstəntiq və prokuror, həm də cinayətdən ziyan çəkmiş şəxslər — zərər çəkmiş şəxs, xüsusi ittihamçı və mülki iddiaçı daxildir. Məhkəmədə ictimai və ictimai-xüsusi ittihamı dövlət ittihamçısı qismində prokuror müdafiə edir (Cinayət-Prosessual Məcəllə, maddə 7.0.23), xüsusi ittiham qaydasında isə ittihamı zərər çəkmiş şəxs özü xüsusi ittihamçı kimi irəli sürür (Cinayət-Prosessual Məcəllə, maddə 7.0.26).

İttiham tərəfi cinayət hadisəsinin baş verməsini, əməlin əlamətlərinin mövcudluğunu, təqsirləndirilən şəxsin bu əmələ aidiyyətini və onun məsuliyyətə cəlb olunmasının mümkünlüyünü sübut edir (Cinayət-Prosessual Məcəllə, maddə 32.2.3). Müdafiə üçün irəli sürülən dəlilləri təkzib etmək vəzifəsi də ona aiddir (Cinayət-Prosessual Məcəllə, maddə 21.3). Dövlət ittihamçısı cinayət təqibindən imtina etdikdə xüsusi ittihamçı təqibi davam etdirə bilər (Cinayət-Prosessual Məcəllə, maddə 88.4.7).