Cinayət təqibi

Cinayət təqibi — qanunvericilikdə tərifi

cinayət təqibi — cinayət hadisəsinin müəyyən edilməsi, cinayət qanunu ilə nəzərdə tutulmuş əməli törətmiş şəxsin ifşa olunması, ittiham irəli sürülməsi, bu ittihamın məhkəmədə müdafiə edilməsi, ona cəza təyin edilməsi, zəruri olduqda prosessual məcburiyyət tədbirlərinin təmin edilməsi məqsədi ilə həyata keçirilən cinayət-prosessual fəaliyyətdir; …

Cinayət təqibi nə deməkdir?

Cinayət təqibi cinayət prosesinin mərkəzi anlayışıdır. Təhqiqatçı, müstəntiq və ya prokuror cinayət əlamətləri barədə məlumat aldıqda və ya cinayət hadisəsini bilavasitə aşkar etdikdə cinayətin izlərinin qorunması üçün tədbir görməli və dərhal təhqiqat və ya istintaq aparmalıdır (Cinayət-Prosessual Məcəllə, maddə 38.1). Təqib cinayət məsuliyyətini istisna edən hallar aşkar edilənədək və ya ittihamçı ondan imtina edənədək davam etdirilməlidir (Cinayət-Prosessual Məcəllə, maddə 38.4).

Cinayətin xarakterindən və ağırlıq dərəcəsindən asılı olaraq cinayət təqibi xüsusi, ictimai-xüsusi və ya ictimai ittiham qaydasında həyata keçirilir (Cinayət-Prosessual Məcəllə, maddə 37.1). Cinayət hadisəsi olmadıqda, cinayət məsuliyyətinə cəlbetmə müddətləri keçdikdə, amnistiya aktı olduqda və qanunda sadalanan digər hallarda təqib başlanmır, başlanmışsa ona xitam verilir (Cinayət-Prosessual Məcəllə, maddə 39.1).