Cinayət prosesi

Cinayət prosesi — qanunvericilikdə tərifi

cinayət prosesi — cinayət təqibi üzrə həyata keçirilən prosessual hərəkətlərin və qəbul olunan prosessual qərarların məcmusudur; …

Cinayət prosesi nə deməkdir?

Cinayət prosesi iki elementdən ibarətdir: cinayət prosesi iştirakçılarının qanuna uyğun həyata keçirdikləri prosessual hərəkətlər (Cinayət-Prosessual Məcəllə, maddə 7.0.37) və hakimin, təhqiqatçının, müstəntiqin və ya prokurorun qəbul etdiyi prosessual qərarlar (Cinayət-Prosessual Məcəllə, maddə 7.0.43). Prosesi həyata keçirən orqanlar təhqiqat, istintaq, prokurorluq orqanları və məhkəmələrdir (Cinayət-Prosessual Məcəllə, maddə 7.0.5).

Prosesdə iştirak edən şəxslər iki qrupa bölünür: cinayət prosesinin iştirakçıları — təhqiqatçı, müstəntiq, prokuror, zərər çəkmiş, şübhəli və ya təqsirləndirilən şəxs, müdafiəçi və başqaları (Cinayət-Prosessual Məcəllə, maddə 7.0.18), habelə prosesdə iştirak edən digər şəxslər — şahid, ekspert, mütəxəssis, tərcüməçi və başqaları (Cinayət-Prosessual Məcəllə, maddə 7.0.29). Məhkəməyədək mərhələdə, habelə birinci, apellyasiya və kassasiya instansiyası məhkəmələrində aparılan icraat Məcəllədə «cinayət mühakimə icraatı» adlanır (Cinayət-Prosessual Məcəllə, maddə 7.0.8).