Torpaq vergisi

Torpaq vergisi — qanunvericilikdə tərifi

203.1. Torpaq vergisi torpaq mülkiyyətçilərinin və ya torpaqdan icarə və ya digər əsaslarla istifadə edən şəxslərin təsərrüfat fəaliyyətinin nəticələrindən asılı olmayaraq torpaq sahəsinə görə hər il sabit tədiyə şəklində hesablanır.

Torpaq vergisi nə deməkdir?

Torpaq vergisi təsərrüfat fəaliyyətinin nəticəsindən asılı olmayaraq torpaq sahəsinə görə hər il sabit tədiyə şəklində hesablanır (Vergi Məcəlləsi, maddə 203.1). Onun ödəyiciləri Azərbaycanda mülkiyyətində, icarəsində və ya digər əsaslarla istifadəsində torpaq sahəsi olan fiziki şəxslər və müəssisələrdir (Vergi Məcəlləsi, maddə 204). Hüquq sənədlərini aldıqdan sonra fiziki şəxslər və bələdiyyə müəssisələri bələdiyyədə, digər müəssisələr isə vergi orqanında 1 ay ərzində uçota durmalıdırlar (Vergi Məcəlləsi, maddə 203.2).

Arayış əsasında təyinatı üzrə istifadə edilən və ya irriqasiya, meliorasiya və digər aqrotexniki səbəblərdən belə istifadəsi mümkün olmayan kənd təsərrüfatı torpaqları üçün dərəcə 1 şərti bal üçün 0,06 manat (Vergi Məcəlləsi, maddə 206.1-1), digər kənd təsərrüfatı torpaqları üçün hər 100 kvadratmetrə görə 2 manatdır (Vergi Məcəlləsi, maddə 206.1). Qalan torpaqlar üzrə dərəcə yaşayış məntəqəsindən və torpağın təyinatından asılıdır (Vergi Məcəlləsi, maddə 206.3). Torpaq Məcəlləsinə görə torpaq vergisi icarə haqqı ilə yanaşı torpaq haqqının formalarından biridir (Torpaq Məcəlləsi, maddə 97).

Nümunə

Bakıda 600 kvadratmetrlik həyətyanı sahənin mülkiyyətçisi hər 100 kvadratmetrə görə 0,6 manat olmaqla ildə 3,6 manat torpaq vergisi ödəyir.