Torpaqların dövlət ehtiyacları üçün alınması

Qanunvericilikdə tərifi

1.1.1. alınma — dövlət ehtiyacları üçün bələdiyyə və xüsusi mülkiyyətdə olan torpaq (onun müəyyən hissəsi) üzərində mülkiyyət, istifadə və icarə hüquqlarına, bu torpaqdan istifadəyə dair müəyyən edilmiş yüklülüklər (məhdudiyyətlər) də daxil olmaqla xitam verilməsi yolu ilə həmin torpağın (onun müəyyən hissəsinin) mülkiyyətçidən könüllü və ya məcburi qaydada əvəzi ödənilməklə dövlət tərəfindən satın alınması, həmçinin istifadədə və (və ya) icarədə olan dövlət torpaqlarının müvafiq kompensasiya ödənilməklə istifadəçidən və ya icarəçidən geri alınması; …

Sadə dildə izah

Alınma könüllü və ya məcburi ola bilər: torpaq mülkiyyətçi ilə razılaşma əsasında, razılıq olmadıqda isə məhkəmənin qanuni qüvvəyə minmiş qərarı ilə məcburi qaydada, hər iki halda kompensasiya ödənilməklə alınır (Torpaqların dövlət ehtiyacları üçün alınması haqqında Qanun, maddə 4.1). Xüsusi və bələdiyyə mülkiyyətində olan torpaqlar alına bilər, dövlət torpaqları üzərində istifadə və icarə hüquqları isə geri alınır (Torpaqların dövlət ehtiyacları üçün alınması haqqında Qanun, maddə 5). «Torpaq» anlayışına binalar, qurğular və torpaqla möhkəm bağlı digər əşyalar da daxildir (Torpaqların dövlət ehtiyacları üçün alınması haqqında Qanun, maddə 1.1.2).

Torpaqlar yalnız Qanunda sadalanan dövlət ehtiyacları üçün alına bilər (Torpaqların dövlət ehtiyacları üçün alınması haqqında Qanun, maddə 3.2). Torpağa sahiblik yalnız məhkəmə qərarından sonra əldə edilə bilər (Torpaqların dövlət ehtiyacları üçün alınması haqqında Qanun, maddə 52.1), alınmanın zəruriliyi və ya kompensasiyanın məbləği ilə razılaşmayan şəxs isə məhkəməyə müraciət edə bilər (Torpaqların dövlət ehtiyacları üçün alınması haqqında Qanun, maddə 29.2).