Yerli vergilər

Yerli vergilər — qanunvericilikdə tərifi

4.4. Yerli vergilər (bələdiyyə vergiləri) dedikdə, bu Məcəllədə və müvafiq qanunla müəyyən edilən, bələdiyyələrin qərarlarına əsasən tətbiq edilən və bələdiyyələrin ərazilərində ödənilən vergilər nəzərdə tutulur.

Yerli vergilər nə deməkdir?

Yerli vergilərə Məcəllədə göstərilən hallarda fiziki şəxslərin torpaq vergisi və əmlak vergisi, habelə bələdiyyə mülkiyyətində olan müəssisə və təşkilatların mənfəət vergisi aiddir (Vergi Məcəlləsi, maddə 8.1). Yerli vergilərin dərəcələri vergi qanunvericiliyində təsbit edilmiş hədlər daxilində müəyyən olunur, bələdiyyələrin tətbiq etdiyi digər məcburi ödənişlər isə müvafiq qanunla müəyyən edilir (Vergi Məcəlləsi, maddə 4.4).

Bələdiyyələr öz ərazilərində vergi ödəyicilərinin ayrı-ayrı kateqoriyalarını yerli vergilərdən tam və ya qismən azad etmək, vergi dərəcəsini azaltmaq barədə qərar qəbul edə bilər (Vergi Məcəlləsi, maddə 4.4). Bu vergilərin hesablanmasına, tam və vaxtında ödənilməsinə nəzarəti bələdiyyələrin vergi xidməti orqanları həyata keçirir (Vergi Məcəlləsi, maddə 32.2); dövlət vergi orqanlarının nəzarəti yerli vergiləri əhatə etmir (Vergi Məcəlləsi, maddə 20.4).