Vergi

Vergi — qanunvericilikdə tərifi

Vergi – dövlətin və bələdiyyələrin fəaliyyətinin maliyyə təminatı məqsədi ilə vergi ödəyicilərinin mülkiyyətində olan pul vəsaitlərinin özgəninkiləşdirilməsi şəklində dövlət büdcəsinə və yerli büdcələrə, köçürülən məcburi, fərdi, əvəzsiz ödənişdir.

Vergi nə deməkdir?

Tərifdəki əlamətlər vergini digər ödənişlərdən fərqləndirir. Məcburilik ödənişin vergi ödəyicisinin istəyindən asılı olmamasını, fərdilik onun konkret vergi ödəyicisinə aid olmasını, əvəzsizlik isə ödənişin müqabilində vergi ödəyicisinə ayrıca qarşılıq nəzərdə tutulmamasını bildirir. Ödəniş vergi ödəyicisinin mülkiyyətində olan pul vəsaitinin özgəninkiləşdirilməsi şəklində edilir, məqsədi isə dövlətin və bələdiyyələrin fəaliyyətinin maliyyə təminatıdır.

Konstitusiyaya görə qanunla müəyyən edilmiş vergiləri tam həcmdə və vaxtında ödəmək hər bir kəsin borcudur, heç kəs qanunla nəzərdə tutulmuş əsaslar olmadan vergi ödəməyə məcbur edilə bilməz (Konstitusiya, maddə 73). Vergi yalnız vergi ödəyicisi və bütün vergitutma elementləri müəyyən edildikdə müəyyən edilmiş hesab olunur (Vergi Məcəlləsi, maddə 12.1), Məcəllədə nəzərdə tutulmayan vergilərin müəyyən edilməsinə isə yol verilmir (Vergi Məcəlləsi, maddə 4.6).