Qısaldılmış iş vaxtı

Qısaldılmış iş vaxtı — qanunvericilikdə tərifi

1. İşçilərin ayrı-ayrı kateqoriyalarına, onların yaşı, səhhəti, əmək şəraiti, əmək funksiyasının xüsusiyyətləri və digər hallar nəzərə alınaraq bu Məcəllə ilə və müvafiq normativ hüquqi aktlarla, habelə əmək müqaviləsinin, kollektiv müqavilənin şərtləri ilə qısaldılmış iş vaxtı müəyyən edilə bilər.

2. Qısaldılmış iş vaxtının müddəti həftə ərzində 16 yaşınadək işçilər üçün 24 saatdan, 16 yaşdan 18 yaşadək işçilər və orqanizmin funksiyalarının 61-100 faiz pozulmasına görə əlilliyi müəyyən edilmiş işçilər üçün, həmçinin hamilə və yaşyarımadək uşağı olan qadınlar və 3 yaşınadək uşağını təkbaşına böyüdən valideynlər üçün 36 saatdan artıq olmamalıdır.

Qısaldılmış iş vaxtı nə deməkdir?

Qısaldılmış iş vaxtı işçinin yaşı, səhhəti, əmək şəraiti və əmək funksiyasının xüsusiyyətləri ilə bağlıdır; onu Məcəllə, digər normativ aktlar, habelə əmək və ya kollektiv müqavilə müəyyən edə bilər (Əmək Məcəlləsi, maddə 91). Əsas xüsusiyyəti ondadır ki, Məcəllədə nəzərdə tutulan qısaldılmış iş vaxtında çalışan işçilərin əmək haqqı normal iş vaxtı üçün müəyyən edilən tam məbləğdə ödənilir (Əmək Məcəlləsi, maddə 159).

Zərərli əmək şəraitli istehsalatlarda (Əmək Məcəlləsi, maddə 92), habelə həkimlər, müəllimlər kimi yüksək zehni və əsəb gərginliyi olan işlərdə həftədə 36 saatdan çox olmayan qısaldılmış iş vaxtı müəyyən edilir (Əmək Məcəlləsi, maddə 93). Qanunvericiliklə müəyyən olunmuş qısaldılmış iş vaxtında çalışmaq işçinin hüququdur (Əmək Məcəlləsi, maddə 9), natamam iş vaxtı isə əsasən tərəflərin razılığı ilə müəyyən edilir (Əmək Məcəlləsi, maddə 94).