Publik hüquqi şəxs

Publik hüquqi şəxs — qanunvericilikdə tərifi

2.2. Publik hüquqi şəxs – dövlət və bələdiyyə adından yaradılan, ümumdövlət və (və ya) ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır.

Publik hüquqi şəxs nə deməkdir?

Publik hüquqi şəxs ictimai əhəmiyyətli vəzifələrin icrası üçün yaradılır, lakin dövlət və ya bələdiyyə orqanı deyil, mülki hüquqların daşıyıcısı olan hüquqi şəxsdir. Dövlət adından onu müvafiq icra hakimiyyəti orqanının müəyyən etdiyi orqan, bələdiyyə adından isə bələdiyyə orqanları yaradır (Publik hüquqi şəxslər haqqında Qanun, maddə 4.1); hüquqi şəxs statusunu dövlət qeydiyyatına alındıqdan sonra əldə edir (Publik hüquqi şəxslər haqqında Qanun, maddə 4.4).

Publik hüquqi şəxs sahibkarlıq fəaliyyəti ilə yalnız bu fəaliyyət nizamnaməsində qarşıya qoyulmuş məqsədlərə xidmət etdikdə məşğul ola bilər (Publik hüquqi şəxslər haqqında Qanun, maddə 3.1). Onun əmlakı nizamnamə fondundan, büdcə vəsaitlərindən, işlərdən və xidmətlərdən daxilolmalardan, ianə, qrant və nizamnamədə müəyyən edilmiş digər mənbələrdən formalaşa bilər (Publik hüquqi şəxslər haqqında Qanun, maddə 7.2). Publik hüquqi şəxs müflis elan oluna bilməz (Publik hüquqi şəxslər haqqında Qanun, maddə 5.4).