Nizamnamə

Nizamnamə — qanunvericilikdə tərifi

47.1. Hüquqi şəxsin təsisçiləri tərəfindən təsdiq edilmiş nizamnaməsi hüquqi şəxsin təsis sənədidir.

Nizamnamə nə deməkdir?

Nizamnamə hüquqi şəxsin əsas təsis sənədidir və onu təsisçilər təsdiq edir. Hüquqi şəxs onun təsis edilməsi və nizamnaməsinin hazırlanması yolu ilə yaradılır (Mülki Məcəllə, maddə 45.1). Nizamnamədə hüquqi şəxsin adı, olduğu yer, fəaliyyətinin idarə edilməsi qaydası və ləğvi qaydası, qeyri-kommersiya hüquqi şəxsində isə həmçinin fəaliyyətin predmeti və məqsədləri müəyyənləşdirilir (Mülki Məcəllə, maddə 47.2).

Hüquqi şəxs bir neçə təsisçi tərəfindən yaradılırsa, onlar müqavilə bağlayaraq nizamnaməni, hüquqi şəxsin yaradılması üzrə birgə fəaliyyət qaydasını və öz əmlaklarının ona verilməsi şərtlərini müəyyənləşdirirlər (Mülki Məcəllə, maddə 45.2). Nizamnamədə dəyişikliklər dövlət qeydiyyatına alındığı andan üçüncü şəxslər üçün hüquqi qüvvəyə minir; lakin bu dəyişiklikləri nəzərə alaraq hərəkət etmiş üçüncü şəxslərlə münasibətlərdə hüquqi şəxs və onun təsisçiləri dəyişikliyin qeydə alınmadığına istinad edə bilməzlər (Mülki Məcəllə, maddə 47.3).