Hüquqi şəxsin ləğvi

Hüquqi şəxsin ləğvi — qanunvericilikdə tərifi

59.1. Hüquqi şəxsin ləğvi onun mövcudluğuna və fəaliyyətinə hüquq və vəzifələri hüquq varisliyi qaydasında başqa şəxslərə keçmədən xitam verilməsi deməkdir.

Hüquqi şəxsin ləğvi nə deməkdir?

Ləğv hüquqi şəxsin mövcudluğuna son qoyur və yenidən təşkildən onunla fərqlənir ki, hüquq və vəzifələr hüquq varisinə keçmir. Hüquqi şəxs təsisçilərin və ya vəkil edilmiş orqanın qərarı ilə, qeydiyyatı məhkəmə tərəfindən etibarsız sayıldıqda, lisenziyasız və ya qadağan edilmiş fəaliyyətə, qanunvericiliyin dəfələrlə və ya kobud pozulmasına görə, habelə Məcəllədə göstərilən digər hallarda məhkəmə qərarı ilə ləğv edilə bilər (Mülki Məcəllə, maddə 59.2). Hüquqi şəxs müflis olma nəticəsində də ləğv edilir (Mülki Məcəllə, maddə 59.4).

Ləğv haqqında qərarla ləğvetmə komissiyası (təsviyəçi, ləğvedici) təyin edilir (Mülki Məcəllə, maddə 60.1) və hüquqi şəxsin işlərini idarə etmək səlahiyyəti ona keçir (Mülki Məcəllə, maddə 60.4). Ləğvetmə prosesinin ümumi müddəti ləğv barədə məlumatın hüquqi şəxslərin dövlət reyestrinə daxil edildiyi andan bir ildən çox olmamalıdır (Mülki Məcəllə, maddə 59.6). Ləğv bu barədə qeydin dövlət reyestrinə daxil edildiyi andan başa çatmış sayılır (Mülki Məcəllə, maddə 61.12).