Lokaut

Lokaut — qanunvericilikdə tərifi

Lokaut — kollektiv əmək mübahisələri zamanı yerinə yetirilməsi müəssisənin və ya fiziki şəxs olan işəgötürənin istehsal, iqtisadi, maliyyə imkanlarına uyğun olmayan kollektiv tələblərlə, hüquqlarını və mənafeyini pozmaq cəhdi ilə keçirilən qanunsuz və əsassız tətillərin qarşısını almaq məqsədi ilə işəgötürən və ya mülkiyyətçi tərəfindən müəssisənin fəaliyyətinin və ya fiziki şəxs olan işəgötürən tərəfindən öz fəaliyyətinin müvəqqəti dayandırılması barədə elandır.

Lokaut nə deməkdir?

Lokaut işəgötürənin tətilə qarşı istifadə etdiyi vasitədir və yalnız Məcəllədə göstərilən hallarda elan edilə bilər: kollektiv tələblərin yerinə yetirilməsi işəgötürənin imkanlarına açıq-aşkar uyğun olmadıqda, qanunsuz elan olunmuş tətil davam etdirildikdə və ya işçilərin tətilə rəqib işəgötürənlər tərəfindən sövq edildiyinə dair təkzibolunmaz sübutlar olduqda. İşçilər, həmkarlar ittifaqları təşkilatı və müvafiq icra hakimiyyəti orqanı azı 10 gün qabaqcadan yazılı xəbərdar edilməlidir (Əmək Məcəlləsi, maddə 284).

Lokautdan əvvəl işəgötürən işçilərlə danışıqlar aparmalı və razılığa nail olmaq üçün bütün imkanlardan istifadə etməlidir. Dövlət mülkiyyətində olan və ya mülkiyyətinin yarısından çoxunda dövlətin payı olan müəssisələrdə lokaut qadağandır (Əmək Məcəlləsi, maddə 284). İşçilərin müraciəti ilə lokautun qanuniliyini məhkəmə yoxlayır və onu qanunsuz saydıqda dəymiş ziyanın ödənilməsi barədə qərar qəbul edir (Əmək Məcəlləsi, maddə 285).