Həbs

Həbs — qanunvericilikdə tərifi

həbs — qətimkan tədbiri qismində bu Məcəllədə nəzərdə tutulmuş hallarda və qaydada təqsirləndirilən şəxsin azadlığını müvəqqəti məhdudlaşdırmaqla həbs yerlərində saxlanılmasıdır; …

Həbs nə deməkdir?

Cinayət prosesində həbs cəza deyil, qətimkan tədbiridir. Qətimkan tədbirləri toplanmış materiallar şəxsin gizlənməsi, istintaqa mane olması, əməli yenidən törətməsi və ya hökmün icrasına maneə törətməsi ehtimalına kifayət qədər əsas verdikdə tətbiq olunur (Cinayət-Prosessual Məcəllə, maddə 155.1). Təqsirsizlik prezumpsiyasına görə şəxsin əmələ aidiyyəti sübut olunmadıqda o, həbs oluna bilməz (Cinayət-Prosessual Məcəllə, maddə 157.1). Məhkəmə qərarı ilə həbs olunmuş şəxs müvəqqəti saxlama yerində 24 saatdan artıq saxlanıla bilməz və istintaq təcridxanasına keçirilməlidir (Cinayət-Prosessual Məcəllə, maddə 157.3).

Məhkəməyədək icraatda həbs müddəti cinayətin ağırlığından asılı olaraq iki, üç və ya dörd ay həddində müəyyən edilir (Cinayət-Prosessual Məcəllə, maddə 158.1), həbsdə saxlanılma müddəti isə sonradan təyin olunan cəza müddətinə daxil edilir (Cinayət-Prosessual Məcəllə, maddə 158.6). Məhkəmə həbsə zərurət olmadığı qənaətinə gəldikdə ev dustaqlığı və ya girov seçir (Cinayət-Prosessual Məcəllə, maddə 157.5). Həbsdən fərqli olaraq tutulma şəxsin azadlığını qısa müddətə məhdudlaşdırır (Cinayət-Prosessual Məcəllə, maddə 7.0.39).