Xarici hüquqi şəxs

Xarici hüquqi şəxs — qanunvericilikdə tərifi

xarici hüquqi şəxs – Azərbaycan Respublikasının hüdudlarından kənarda yaradılmış hüquqi şəxsdir; …

Xarici hüquqi şəxs nə deməkdir?

Hüquqi şəxsin xarici sayılması onun iştirakçılarının vətəndaşlığından deyil, yaradıldığı yerdən asılıdır. Buna görə əcnəbi və ya xarici hüquqi şəxs tərəfindən Azərbaycanda təsis edilib qeydiyyata alınan xarici investisiyalı məhdud məsuliyyətli cəmiyyət (Hüquqi şəxslərin dövlət qeydiyyatı və dövlət reyestri haqqında Qanun, maddə 2.0.15) xarici hüquqi şəxs sayılmır. Xarici hüquqi şəxsin Azərbaycandakı nümayəndəliyi və ya filialı dövlət qeydiyyatına alınmalı və yalnız bundan sonra fəaliyyət göstərə bilər (Hüquqi şəxslərin dövlət qeydiyyatı və dövlət reyestri haqqında Qanun, maddə 4.1).

Nümayəndəlik və ya filialın qeydiyyatı üçün əlavə sənədlər, o cümlədən xarici hüquqi şəxsin təsdiq etdiyi əsasnamə, onun yaradılması haqqında qərar və leqallaşdırılmış ticarət reyestrindən çıxarış təqdim olunur (Hüquqi şəxslərin dövlət qeydiyyatı və dövlət reyestri haqqında Qanun, maddə 6.1). Qanunda ayrı hal nəzərdə tutulmayıbsa, mülki qanunvericiliyin qaydaları xarici hüquqi şəxslərin iştirak etdiyi münasibətlərə də tətbiq olunur (Mülki Məcəllə, maddə 9.2).