Yüklülük üzrə üstünlük hüququ

Yüklülük üzrə üstünlük hüququ — qanunvericilikdə tərifi

üstünlük hüququ – yüklülük predmeti hesabına yüklülük sahibinin tələbinin digər yüklülük sahiblərinin və kreditorların tələblərinə münasibətdə üstün növbədə ödənilməsi; …

Yüklülük üzrə üstünlük hüququ nə deməkdir?

Eyni daşınar əmlak bir neçə yüklülüyün predmeti ola bildiyinə görə (Daşınar əmlakın yüklülüyü haqqında Qanun, maddə 3.2), kimin tələbinin birinci ödəniləcəyi əvvəlcədən müəyyən olmalıdır. Birinci növbədə yüklülüyü reyestrdə qeydiyyat, sahiblik və ya nəzarət yolu ilə üçüncü şəxslərə açıqlamış yüklülük sahibinin, ikinci növbədə açıqlamamış yüklülük sahibinin tələbləri ödənilir, bütün digər tələblər isə qanunvericiliklə müəyyən edilmiş qaydada ödənilir (Daşınar əmlakın yüklülüyü haqqında Qanun, maddə 6.1).

Bir neçə yüklülük sahibi açıqlama üsulunu tətbiq etdikdə növbəlik tətbiqetmə anı, yəni tarixi və saatı ilə müəyyən edilir (Daşınar əmlakın yüklülüyü haqqında Qanun, maddə 7.1). Üstünlük hüququ yüklülük sahibləri arasında müqavilə ilə istənilən vaxt dəyişdirilə bilər (Daşınar əmlakın yüklülüyü haqqında Qanun, maddə 6.2), lakin dövlət yüklülüyü üzrə yüklülük sahibi öz növbəsini xüsusi yüklülük sahibinə güzəşt edə bilməz (Daşınar əmlakın yüklülüyü haqqında Qanun, maddə 6.3). Bu anlayışı Mülki Məcəllədəki satın almaqda üstünlük hüququ ilə qarışdırmaq olmaz.