Protest

Protest — qanunvericilikdə tərifi

protest — dövlət ittihamçısının iştirak etdiyi cinayət işi və ya cinayət təqibi ilə bağlı digər material üzrə hökmdən və ya məhkəmənin digər qərarından prokurorun yuxarı məhkəməyə verilən şikayətidir; …

Protest nə deməkdir?

Protest prokurorun məhkəmə qərarından narazılığını bildirmə formasıdır. Apellyasiya protesti vermək hüququna birinci instansiyada işə baxılmasında iştirak etmiş dövlət ittihamçısı onun nəticə və təkliflərinin nəzərə alınmadığı hissədə malikdir; o, vəfat etdikdə, protest verməkdən yayındıqda və ya imtina etdikdə, habelə onun mövqeyi ilə razılaşmadıqda protesti Baş prokuror və ya onun müavini verə bilər (Cinayət-Prosessual Məcəllə, maddə 383.2).

Apellyasiya protesti hökmün elan olunduğu andan 20 gün müddətində verilir (Cinayət-Prosessual Məcəllə, maddə 384.1). Kassasiya protestini isə apellyasiya instansiyası məhkəməsinin icraatında iştirak etmiş dövlət ittihamçısı verir (Cinayət-Prosessual Məcəllə, maddə 409.9). Protest şikayətdən subyektinə görə fərqlənir: apellyasiya şikayətini məhkum, bəraət almış şəxs, onların müdafiəçiləri, zərər çəkmiş şəxs, mülki iddiaçı və digər iştirakçılar verir (Cinayət-Prosessual Məcəllə, maddə 383.1).