Kassasiya instansiyası məhkəməsi

Kassasiya instansiyası məhkəməsi — qanunvericilikdə tərifi

kassasiya instansiyası məhkəməsi — bu Məcəllə ilə müəyyən edilmiş qaydada və hallarda apellyasiya instansiyası məhkəməsinin qanuni qüvvəyə minmiş hökmündən və ya digər qərarından verilmiş şikayət, protest, yaxud təqdimatlara baxmaq səlahiyyətinə malik olan məhkəmədir; …

Kassasiya instansiyası məhkəməsi nə deməkdir?

Kassasiya instansiyası cinayət mühakimə icraatında birinci və apellyasiya instansiyasından sonra gələn instansiyadır (Cinayət-Prosessual Məcəllə, maddə 7.0.8). Kassasiya şikayəti və ya protesti yalnız apellyasiya instansiyası məhkəmələrinin hökm və qərarlarından verilə bilər (Cinayət-Prosessual Məcəllə, maddə 408.1); apellyasiya məhkəmələrinin cinayət kollegiyalarının qərarlarından şikayətlərə Ali Məhkəmənin cinayət işləri üzrə məhkəmə kollegiyası baxır (Cinayət-Prosessual Məcəllə, maddə 408.2.5).

Apellyasiya instansiyası qanuni qüvvəyə minməmiş qərarları yoxladığı halda (Cinayət-Prosessual Məcəllə, maddə 7.0.11), kassasiya instansiyası qanuni qüvvəyə minmiş qərarlara baxır. Kassasiya şikayəti vermək hüququna, o cümlədən, məhkum edilmiş və ya bəraət almış şəxs, onun müdafiəçisi, zərər çəkmiş şəxs (xüsusi ittihamçı), mülki iddiaçı və mülki cavabdeh malikdir (Cinayət-Prosessual Məcəllə, maddə 409.1), protesti isə apellyasiya instansiyasında iştirak etmiş dövlət ittihamçısı verir (Cinayət-Prosessual Məcəllə, maddə 409.9).