Hüquqi terminMəhkəmə və hüquq mühafizə orqanları
Prokurorluq
Həmçinin: prokurorluq orqanları
QISACA
Məhkəmə hakimiyyəti sisteminə daxil olan, ərazi və ixtisaslaşdırılmış prokurorların Baş prokurora tabeliyinə əsaslanan vahid mərkəzləşdirilmiş orqan.
Prokurorluq — qanunvericilikdə tərifi
Azərbaycan Respublikasının Prokurorluğu (bundan sonra – "prokurorluq") məhkəmə hakimiyyəti sistemində daxil olmaqla ərazi və ixtisaslaşdırılmış prokurorluqların Azərbaycan Respublikasının baş prokuroruna tabeliyinə əsaslanan vahid mərkəzləşdirilmiş orqandır.
Prokurorluq nə deməkdir?
Prokurorluq qanunların icra və tətbiq olunmasına nəzarət edir, cinayət işləri başlayır və istintaq aparır, məhkəmədə dövlət ittihamını müdafiə edir, iddia qaldırır və məhkəmə qərarlarından protest verir (Konstitusiya, maddə 133). Fövqəladə prokurorluqların, xarici dövlətlərin prokurorluqlarının, yaxud qanunla nəzərdə tutulmayan qaydada prokurorluqların yaradılması qadağandır (Prokurorluq haqqında Qanun, maddə 2).
Prokurorluq sisteminə Baş Prokurorluq, Baş prokuror yanında Korrupsiyaya qarşı Mübarizə Baş İdarəsi, Hərbi Prokurorluq, Naxçıvan Muxtar Respublikasının Prokurorluğu, rayon (şəhər) və hərbi ixtisaslaşdırılmış prokurorluqlar daxildir (Prokurorluq haqqında Qanun, maddə 8). Prokurorluğun üzərinə Konstitusiyada, «Prokurorluq haqqında» Qanunda və prosessual qanunvericilikdə nəzərdə tutulmamış vəzifələrin qoyulması yolverilməzdir (Prokurorluq haqqında Qanun, maddə 4).
Mənbə: Prokurorluq haqqında Azərbaycan Respublikasının Qanunu, maddə 2