Ombudsman

Ombudsman — qanunvericilikdə

8.1. Müvəkkil Azərbaycan Respublikası vətəndaşlarının, əcnəbilərin və vətəndaşlığı olmayan şəxslərin, hüquqi şəxslərin (bundan sonra – ərizəçi) insan hüquqlarının pozulmasına dair şikayətlərinə baxır.

Ombudsman nə deməkdir?

Azərbaycan Respublikasının İnsan hüquqları üzrə müvəkkili vəzifəsi Konstitusiyada və beynəlxalq müqavilələrdə təsbit olunmuş, dövlət orqanları, bələdiyyələr, dövlət mülkiyyətində olan hüquqi şəxslər və onların vəzifəli şəxsləri tərəfindən pozulan insan hüquqlarının bərpası və pozuntuların qarşısının alınması üçün təsis edilib (İnsan hüquqları üzrə müvəkkil (ombudsman) haqqında Konstitusiya Qanunu, maddə 1.1). Onun əsas işi vətəndaşların, əcnəbilərin, vətəndaşlığı olmayan şəxslərin və hüquqi şəxslərin şikayətlərinə baxmaqdır (İnsan hüquqları üzrə müvəkkil (ombudsman) haqqında Konstitusiya Qanunu, maddə 8.1).

Ombudsman həmçinin milli preventiv mexanizmin funksiyalarını və «İnformasiya əldə etmək haqqında» Qanunun tələblərinə nəzarəti həyata keçirir. Onun fəaliyyəti hüquqları müdafiə edən digər dövlət orqanlarının səlahiyyətlərini məhdudlaşdırmır və əvəz etmir; Prezidentin, Milli Məclis deputatlarının və hakimlərin fəaliyyətinin yoxlanılması ombudsmanın səlahiyyətinə aid deyil (İnsan hüquqları üzrə müvəkkil (ombudsman) haqqında Konstitusiya Qanunu, maddə 1).