Lizinq

Lizinq — qanunvericilikdə tərifi

747.1. Lizinq müqaviləsinə görə lizinq verən müəyyən əşyanı müqavilə ilə şərtləşdirilmiş müəyyən haqla, müəyyən müddətə və digər şərtlərlə (lizinq alana əmlakı satın almaq hüququnun verilməsi də daxil olmaqla) lizinq alanın istifadəsinə verməyə borcludur. Lizinq alan müəyyənləşdirilmiş dövriliklə muzd ödəməyə borcludur.

Lizinq nə deməkdir?

Lizinqdə lizinq verən müqavilədə nəzərdə tutulan əmlakı hazırlamağa və ya əldə etməyə borcludur (Mülki Məcəllə, maddə 747.2), lizinq alan isə ondan istifadə edərək müəyyən dövriliklə muzd ödəyir. Lizinq müqaviləsinin subyektləri lizinq verən, lizinq alan və əmlakı lizinq verənə satan satıcıdır (Mülki Məcəllə, maddə 747-1.1). Lizinq obyekti mülki dövriyyədən çıxarılmış və ya dövriyyəsi məhdudlaşdırılmış əşyalar istisna olmaqla, əsas vəsaitə aid olan daşınar və daşınmaz əşyalardır (Mülki Məcəllə, maddə 747-2).

Lizinq müqaviləsi yazılı formada bağlanır (Mülki Məcəllə, maddə 748.1). Lizinq alana müvəqqəti sahibliyə və istifadəyə verilmiş obyekt lizinq verənin mülkiyyəti olaraq qalır (Mülki Məcəllə, maddə 748-2.1). Müqavilə ilə lizinq alana müddət qurtardıqdan sonra lizinq predmetini əldə etmək və ya kirayələmək hüququ verilə və ya belə vəzifə həvalə edilə bilər (Mülki Məcəllə, maddə 747.3).