Əmlak kirayəsi

Əmlak kirayəsi — qanunvericilikdə tərifi

Əmlak kirayəsi müqaviləsinə görə, kirayəyə verən əşyanı kirayəçinin istifadəsinə verməyi, kirayəçi isə bunun üçün kirayəyə verənə kirayə haqqı ödəməyi öhdəsinə götürür.

Əmlak kirayəsi nə deməkdir?

Əmlak kirayəsi əşyaya mülkiyyət hüququnu deyil, yalnız ondan müvəqqəti istifadə imkanını verir. Bütün kirayə müddəti ərzində kirayəyə verən əşyanın istifadə üçün yararlı vəziyyətdə olmasına, müqavilədə qarantiya verilmiş xassələrə malik olmasına və üçüncü şəxslərin hüquqlarının istifadəyə mane olmamasına görə məsuliyyət daşıyır (Mülki Məcəllə, maddə 676). Kirayəyə verənin icazəsi olmadan kirayəçi əşyanı üçüncü şəxsin istifadəsinə, o cümlədən ikinci əldən kirayəyə verə bilməz (Mülki Məcəllə, maddə 683.1).

Kirayə müddəti bir aydan qısadırsa, kirayə haqqı müddətin sonunda, bir aydan çoxdursa, zərurət olduqda hər ayın sonunda hissə-hissə ödənilir (Mülki Məcəllə, maddə 684.1). Kirayə hüquq münasibətlərinə müqavilənin bağlandığı müddət bitdikdə xitam verilir (Mülki Məcəllə, maddə 689.1); müddət müəyyənləşdirilməyibsə, istənilən tərəf müqavilənin ləğvinə dair bildiriş verə bilər (Mülki Məcəllə, maddə 689.2). Əvəzsiz istifadə müqaviləsindən fərqli olaraq əmlak kirayəsi əvəzli müqavilədir.