Dövlət məvacibi

Dövlət məvacibi — qanunvericilikdə tərifi

1.1.6. dövlət məvacibi – dövlət qulluqçusuna pul formasında nağdsız qaydada ödənilən aylıq haqq; …

Dövlət məvacibi nə deməkdir?

Dövlət məvacibi dövlət qulluqçusunun əməyinin ödənilməsi formasıdır. Ona aylıq vəzifə maaşı, ixtisas dərəcəsinə görə əlavə haqq, aylıq iş vaxtı norması 5 saatdan çox artırıldıqda hər saata görə əlavə haqq və əmək şəraiti ilə bağlı əlavələr daxildir (Dövlət qulluğu haqqında Qanun, maddə 33-2.1). Aylıq vəzifə maaşı mütənasiblik amili nəzərə alınmaqla əməyin ödəniş səviyyəsinə və pilləsinə uyğun müəyyən edilir (Dövlət qulluğu haqqında Qanun, maddə 33-2.2).

Dövlət büdcəsindən ödənilən məvacib yalnız Dövlət qulluğu haqqında Qanunla müəyyən edilir (Dövlət qulluğu haqqında Qanun, maddə 33-2.3). Dövlət qulluğunda iş vaxtı həftədə 40 saatdır (Dövlət qulluğu haqqında Qanun, maddə 30.1); dövlət orqanının rəhbəri müstəsna hallarda iş vaxtını ayda əvəzi ödənilmədən 5 saata qədər artıra bilər (Dövlət qulluğu haqqında Qanun, maddə 30.2). Xidməti fəaliyyətin illik qiymətləndirilməsi məvacibin məbləğinin müəyyənləşdirilməsi məqsədi də daşıyır (Dövlət qulluğu haqqında Qanun, maddə 1.1.19).