Üçüncü şəxsin xeyrinə müqavilə

Üçüncü şəxsin xeyrinə müqavilə — qanunvericilikdə tərifi

403.1. Üçüncü şəxsin xeyrinə müqavilə elə müqavilədir ki, onun tərəfləri borclunun icranı müqavilədə göstərilmiş və ya göstərilməmiş, öhdəliyin öz xeyrinə icrasını borcludan tələb etmək hüququ olan üçüncü şəxsə həyata keçirməli olduğunu müəyyənləşdirirlər.

Üçüncü şəxsin xeyrinə müqavilə nə deməkdir?

Üçüncü şəxsin xeyrinə müqavilədə kreditor və borclu razılaşırlar ki, borclu öhdəliyi kreditora deyil, müqavilədə tərəf olmayan üçüncü şəxsə icra etsin. Üçüncü şəxs müqavilədə göstərilə də, göstərilməyə də bilər. Bu Məcəllədə və ya müqavilədə ayrı qayda nəzərdə tutulmayıbsa, müqavilənin icrasını həm kreditor, həm də üçüncü şəxs tələb edə bilər (Mülki Məcəllə, maddə 403.2).

Üçüncü şəxs öz hüququndan istifadə etmək niyyətini borcluya bildirdiyi andan, ayrı qayda yoxdursa, tərəflər müqaviləni onun razılığı olmadan ləğv edə və ya dəyişdirə bilməzlər (Mülki Məcəllə, maddə 403.5). Borclu kreditora qarşı irəli sürə biləcəyi etirazları üçüncü şəxsin tələbinə qarşı da irəli sürə bilər (Mülki Məcəllə, maddə 403.6). Üçüncü şəxs ona verilmiş hüquqdan imtina etdikdə həmin hüquqdan, Məcəlləyə və müqaviləyə zidd deyilsə, kreditor istifadə edə bilər (Mülki Məcəllə, maddə 403.7).