Övladlığa götürmək hüququ olan şəxslər

Övladlığa götürmək hüququ olan şəxslər — qanunvericilikdə tərifi

120.1. Aşağıdakılar istisna olmaqla, hər iki cinsdən olan bu Məcəllənin 121.1-ci və 121.2-ci maddələri ilə müəyyən edilən tələblərə cavab verən şəxs (şəxslər) övladlığa götürən ola bilərlər:

120.1.1. məhkəmə tərəfindən fəaliyyət qabiliyyəti olmayan və ya məhdud fəaliyyət qabiliyyətli hesab edilən şəxslər;

120.1.2. məhkəmə tərəfindən valideynlik hüquqlarından məhrum edilmiş və ya valideynlik hüquqları məhdudlaşdırılmış şəxslər;

120.1.3. qanunla üzərinə qoyulan vəzifəni yerinə yetirmədiyinə görə qəyyum və ya himayəçi vəzifələrindən kənarlaşdırılmış şəxslər; …

Övladlığa götürmək hüququ olan şəxslər nə deməkdir?

Hər iki cinsdən olan və yaşa dair tələblərə cavab verən şəxs övladlığa götürən ola bilər. Lakin fəaliyyət qabiliyyəti olmayan və ya məhdud fəaliyyət qabiliyyətli hesab edilmiş, valideynlik hüquqlarından məhrum edilmiş və ya bu hüquqları məhdudlaşdırılmış, vəzifəsini yerinə yetirmədiyinə görə qəyyum (himayəçi) vəzifəsindən kənarlaşdırılmış, əvvəllər təqsirli bilinərək bu hüququ məhkəmə tərəfindən ləğv edilmiş, habelə səhhətinə görə valideyn vəzifələrini həyata keçirə bilməyən şəxslər övladlığa götürən ola bilməz (Ailə Məcəlləsi, maddə 120.1).

Bundan başqa, məhkumluğun götürülməsindən asılı olmayaraq sülh və insanlıq, həyat və sağlamlıq, cinsi toxunulmazlıq, ailə münasibətləri və qanunda sadalanan digər obyektlər əleyhinə qəsdən törədilən ağır və ya xüsusilə ağır cinayətlərə görə məhkum olunmuş şəxslər (Ailə Məcəlləsi, maddə 120.1.6), barəsində cinayət təqibi aparılan şəxslər təqib müddətində (Ailə Məcəlləsi, maddə 120.1.7), habelə ögey valideyn və qohumlar istisna olmaqla, ailədə adambaşına düşən orta aylıq gəliri yaşayış minimumundan az olan şəxslər (Ailə Məcəlləsi, maddə 120.1.8) övladlığa götürən ola bilməz. Aralarında nikah olmayan şəxslər eyni uşağı birlikdə övladlığa götürə bilməz (Ailə Məcəlləsi, maddə 120.3).