Miras

Miras — qanunvericilikdə tərifi

1151.1. Mirasa (miras əmlaka) miras qoyanın öldüyü məqamadək malik olduğu əmlak hüquqlarının (miras aktivi) və vəzifələrin (miras passivi) toplusu daxildir.

Miras nə deməkdir?

Miras yalnız əşyalardan ibarət deyil: ona miras qoyanın əmlak hüquqları ilə yanaşı borcları və digər vəzifələri də daxildir. Mirasa ümumi mülkiyyətdən ölənə çatası pay, əmlakın naturada bölünməsi mümkün olmadıqda isə bu əmlakın dəyəri daxildir (Mülki Məcəllə, maddə 1151.2). Vərəsələr miras qoyanın kreditorları qarşısında alınmış aktivdə hər birinin payına mütənasib surətdə birgə borclu kimi məsuliyyət daşıyırlar (Mülki Məcəllə, maddə 1306.1); mirasın siyahısı notarius tərəfindən tərtib edildikdə isə mirasdan alınmış aktiv həddində məsuliyyət daşıyırlar (Mülki Məcəllə, maddə 1306.4).

Şəxsi xarakter daşıyan və yalnız miras qoyana mənsub ola bilən hüquq və vəzifələr, habelə yalnız kreditorun və borclunun sağlığında qüvvədə olan hüquq və vəzifələr mirasın tərkibinə daxil deyildir (Mülki Məcəllə, maddə 1153). Miras qoyan vəsiyyətnamə tərtib edilərkən onda olmayan əmlakı da nəzərdə tuta bilər, bu şərtlə ki, mirasın açılacağı vaxtadək həmin əmlak onun mülkiyyəti olsun (Mülki Məcəllə, maddə 1152).