Məhkəmə eksperti

Məhkəmə eksperti — qanunvericilikdə tərifi

məhkəmə eksperti (ekspert) – məhkəmə ekspertizasının aparılması həvalə olunmuş, məhkəmə ekspertizasının predmetinə aid olan xüsusi məsələlərə dair zəruri biliyə malik olan və işin nəticəsində marağı olmayan, məhkəmə eksperti şəhadətnaməsi almış şəxsdir; …

Məhkəmə eksperti nə deməkdir?

Məhkəmə eksperti ali təhsilli və müəyyən ekspertiza ixtisası üzrə xüsusi biliklərə malik Azərbaycan Respublikasının vətəndaşı ola bilər. İkili vətəndaşlığı olan, din xadimi, məhkəmə qərarı ilə fəaliyyət qabiliyyəti olmayan və ya məhdud fəaliyyət qabiliyyətli hesab olunmuş, cinayət törətdiyinə görə məhkum olunmuş şəxs, habelə qanunda sadalanan digər şəxslər ekspert ola bilməz. Fəaliyyət üçün məhkəmə eksperti şəhadətnaməsi alınmalıdır; özəl ekspert olmaq istəyən şəxs isə əlavə olaraq ixtisası üzrə ən azı 10 il işləmək, fəlsəfə doktoru və ya elmlər doktoru elmi dərəcəsinə, yaxud beynəlxalq səviyyədə tanınan sənədə malik olmaq tələblərindən birinə cavab verməlidir (Dövlət məhkəmə ekspertizası fəaliyyəti haqqında Qanun, maddə 11).

Ekspert iş materialları ilə tanış olmaq, əlavə obyektlərin təqdim olunması və başqa ekspertlərin cəlb edilməsi barədə vəsatət vermək hüququna malikdir, müstəqil olaraq material toplamaq isə ona qadağandır (Dövlət məhkəmə ekspertizası fəaliyyəti haqqında Qanun, maddə 12). O, çağırış üzrə gəlməyə, tam tədqiqat aparıb əsaslandırılmış və obyektiv rəy verməyə, tədqiqat obyektlərini qorumağa borcludur (Dövlət məhkəmə ekspertizası fəaliyyəti haqqında Qanun, maddə 13).