Dövlət ərazisi

Dövlət ərazisi — qanunvericilikdə

I. Azərbaycan Respublikasının ərazisi vahiddir, toxunulmazdır və bölünməzdir.

II. Azərbaycan Respublikasının daxili suları, Xəzər dənizinin (gölünün) Azərbaycan Respublikasına mənsub olan bölməsi, Azərbaycan Respublikasının üzərindəki hava məkanı Azərbaycan Respublikası ərazisinin tərkib hissəsidir.

Dövlət ərazisi nə deməkdir?

Dövlət ərazisi dövlət hakimiyyətinin həyata keçirildiyi məkandır. Konstitusiya Azərbaycan Respublikasının ərazisini vahid, toxunulmaz və bölünməz elan edir. Ərazinin tərkibinə quru ilə yanaşı daxili sular, Xəzər dənizinin (gölünün) Azərbaycan Respublikasına mənsub olan bölməsi və Azərbaycan Respublikasının üzərindəki hava məkanı daxildir.

Ərazi özgəninkiləşdirilə bilməz və onun heç bir hissəsi heç bir şəkildə kimsəyə verilmir. Dövlət sərhədləri yalnız Milli Məclisin qərarı ilə Azərbaycanın bütün əhalisi arasında referendum keçirmək yolu ilə, xalqın iradəsi əsasında dəyişdirilə bilər (Konstitusiya, maddə 11). Ərazi bütövlüyünün təminatçısı Prezidentdir (Konstitusiya, maddə 8), Naxçıvan Muxtar Respublikası isə Azərbaycan Respublikasının ayrılmaz tərkib hissəsidir (Konstitusiya, maddə 134).