Dövlət Gerbi

Dövlət Gerbi — qanunvericilikdə tərifi

1.1. Azərbaycan Respublikası Konstitusiyasının 23-cü maddəsinin I hissəsinə əsasən, Azərbaycan Respublikasının Dövlət Gerbi Azərbaycan Respublikasının dövlət rəmzidir.

Dövlət Gerbi nə deməkdir?

Dövlət Gerbi Dövlət bayrağı və Dövlət himni ilə birlikdə Azərbaycan Respublikasının dövlət rəmzidir (Konstitusiya, maddə 23). Onun təsviri ayrıca Konstitusiya Qanunu ilə müəyyən edilir (Dövlət Gerbindən istifadə qaydaları haqqında Qanun, maddə 1.2). Hər bir vətəndaş, habelə əcnəbilər və vətəndaşlığı olmayan şəxslər Dövlət Gerbinə hörmət etməlidir, hörmətsizliyin nümayiş etdirilməsi isə qanunla müəyyən edilmiş məsuliyyətə səbəb olur (Dövlət Gerbindən istifadə qaydaları haqqında Qanun, maddə 2).

Gerbin qabarıq təsviri Prezident sarayına, Milli Məclisin binasına, məhkəmələrin binalarına və iclas salonlarına, diplomatik nümayəndəliklərin binalarına vurulur (Dövlət Gerbindən istifadə qaydaları haqqında Qanun, maddə 6.1). Onun təsvirindən hüquqi aktların blanklarında, pul nişanlarında, şəxsiyyət vəsiqəsində və pasportda istifadə olunur (Dövlət Gerbindən istifadə qaydaları haqqında Qanun, maddə 7.1). Gerb oturulan və ayaq basılan yerlərdə təsvir edilə bilməz, onun təhrifinə yol verilmir (Dövlət Gerbindən istifadə qaydaları haqqında Qanun, maddə 8).