Subroqasiya

Subroqasiya — qanunvericilikdə tərifi

936.1. Subroqasiya hüququ bu Məcəllənin 936.6-cı maddəsi nəzərə alınmaqla, sığorta ödənişi almış şəxsin ona dəymiş zərərə görə məsuliyyət daşıyan şəxsə qarşı malik olduğu hüquqlardan və vasitələrdən həmin ödənişi vermiş sığortaçının istifadə etmək hüququdur.

Subroqasiya nə deməkdir?

Subroqasiya sayəsində zərərin əvəzi son nəticədə zərəri vurmuş şəxsin üzərinə düşür: sığortaçı faydalanan şəxsə ödəniş verdikdən sonra onun yerinə keçərək zərərvurana tələb irəli sürür. Faydalanan şəxsin zərərvurana qarşı zərərin əvəzini ödəmək tələbi ilə bağlı hüququ əmlak sığortası üzrə ödəniş vermiş sığortaçıya onun verdiyi ödəniş məbləğində keçir (Mülki Məcəllə, maddə 936.2).

Faydalanan şəxs ödənişi aldıqda subroqasiya üçün lazım olan bütün sənədləri sığortaçıya verməlidir (Mülki Məcəllə, maddə 936.3); zərərvurana qarşı iddiadan və ya sənədləri verməkdən imtina etdikdə sığortaçı ala biləcəyi məbləğ həcmində ödənişdən azad edilir (Mülki Məcəllə, maddə 936.4). Sığortaçı bu hüquqdan zərərvuranın özünə, onun məsuliyyətini sığortalamış sığortaçıya və ya zərərə görə məsuliyyət daşıya bilən digər şəxsə qarşı istifadə edə bilər (Mülki Məcəllə, maddə 936.5). Həyat sığortası sinifləri və fərdi qəza sığortası üzrə subroqasiya tətbiq edilmir (Mülki Məcəllə, maddə 936.6).

Nümunə

Sığortalanmış avtomobilə başqa sürücünün təqsiri ilə zərər dəyir; sığortaçı avtomobilin sahibinə ödəniş verdikdən sonra ödədiyi məbləği təqsirkar sürücüdən tələb edir.