Prezident seçkiləri

Prezident seçkiləri — qanunvericilikdə tərifi

I. Azərbaycan Respublikasının Prezidenti ümumi, bərabər və birbaşa seçki hüququ əsasında, sərbəst, şəxsi və gizli səsvermə yolu ilə 7 il müddətinə seçilir. Azərbaycan Respublikasının Prezidenti növbədənkənar Azərbaycan Respublikası Prezidenti seçkilərini elan edə bilər.

II. Azərbaycan Respublikasının Prezidenti səsvermədə iştirak edənlərin yarısından çoxunun səs çoxluğu ilə seçilir.

III. Bu səs çoxluğu səsvermənin birinci dövrəsində toplanmayıbsa, səsvermə günündən sonra ikinci bazar günü səsvermənin ikinci dövrəsi keçirilir.

Prezident seçkiləri nə deməkdir?

Prezident səsvermədə iştirak edənlərin yarısından çoxunun səsi ilə seçilir. Birinci dövrədə bu çoxluq toplanmadıqda səsvermə günündən sonra ikinci bazar günü ən çox səs toplamış iki namizəd arasında ikinci dövrə keçirilir və orada səs çoxluğu toplayan namizəd Prezident seçilmiş sayılır (Konstitusiya, maddə 101). Namizədə aid tələblər Konstitusiyada müəyyən edilib: ölkədə 10 ildən artıq daimi yaşamaq, ali təhsil, ikili vətəndaşlığın və başqa dövlətlər qarşısında öhdəliyin olmaması (Konstitusiya, maddə 100).

Namizədin müdafiəsi üçün azı 40 min seçici imzası toplanmalıdır, bu zaman ən azı 60 seçki dairəsinin hər birinin ərazisindən azı 50 imza olmalıdır (Seçki Məcəlləsi, maddə 181.1). Mərkəzi Seçki Komissiyası səsvermə günündən 10 gündən gec olmayaraq seçkilərə yekun vurur və nəticələri Konstitusiya Məhkəməsinə təqdim edir (Seçki Məcəlləsi, maddə 203.1); Konstitusiya Məhkəməsi yekunları səsvermə günündən sonra 14 gün ərzində rəsmən elan edir (Konstitusiya, maddə 102).