Podrat müqaviləsi

Podrat müqaviləsi — qanunvericilikdə tərifi

752.1. Podrat müqaviləsinə görə podratçı müqavilədə nəzərdə tutulan işi icra etməyi, sifarişçi isə podratçıya razılaşdırılmış muzd ödəməyi öhdəsinə götürür.

Podrat müqaviləsi nə deməkdir?

Podrat müqaviləsi müəyyən nəticənin əldə edilməsinə yönəlib: podratçı işi elə icra etməlidir ki, onun nəticəsi qüsurlardan, üçüncü şəxslərin hüquq və iddialarından azad olsun (Mülki Məcəllə, maddə 762.1). Bu cəhət podratı tapşırıq müqaviləsindən fərqləndirir, çünki vəkalət alan konkret nəticə əldə olunmasına təminat vermir (Mülki Məcəllə, maddə 777.1). Podratçı məmulatı öz materiallarından hazırlayırsa, hazır məmulata mülkiyyəti sifarişçiyə verir (Mülki Məcəllə, maddə 752.2).

Sifarişçi şərtləşdirilmiş muzdu ödəməyə borcludur; muzdun miqdarı müəyyənləşdirilməyibsə, adi muzdun şərtləşdirildiyi hesab olunur (Mülki Məcəllə, maddə 753.1). Hissə-hissə ödəniş nəzərdə tutulmayıbsa, muzd iş yerinə yetirildikdən sonra ödənilir (Mülki Məcəllə, maddə 769). Görülmüş işin təsadüfən məhv olması riski icra sifarişçiyə verilənədək podratçının üzərinə düşür (Mülki Məcəllə, maddə 772.1). Podratçı işi şəxsən yerinə yetirməyə yalnız bu, müqavilədən, konkret hallardan və ya işin xarakterindən irəli gəldikdə borcludur (Mülki Məcəllə, maddə 755).