Notariat sirri

Notariat sirri — qanunvericilikdə tərifi

Notariuslar, notariat hərəkətləri aparan digər vəzifəli şəxslər və xidməti vəzifələrini yerinə yetirmələri ilə əlaqədar notariat hərəkətlərindən xəbərdar olan şəxslər bu hərəkətlərin sirrini saxlamağa borcludurlar.

Notariat sirri nə deməkdir?

Notariat sirri notariat hərəkətinin aparılmasını tapşıran şəxsin maraqlarını qoruyur. Notariat hərəkətləri barədə arayışlar və sənədlər, bir qayda olaraq, yalnız hərəkətin aparılmasını tapşırmış və ya barəsində hərəkət aparılmış fiziki və hüquqi şəxslərə verilir. Vəsiyyətnamələr haqqında arayışlar isə yalnız vəsiyyətçinin ölümündən sonra verilə bilər.

Qanun bu qaydadan istisnalar müəyyən edir: notariat sənədləri məhkəmə, istintaq və təhqiqat orqanlarına onların icraatında olan konkret cinayət və ya mülki işlərlə əlaqədar qərarları əsasında verilir, sənədlərin surətləri isə vəkilə onun yazılı sorğusu və orderi əsasında verilir. «Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında» Qanunla müəyyən edilmiş hallarda məlumat maliyyə monitorinqi orqanına da təqdim olunur (Notariat haqqında Qanun, maddə 32). Sirrin açılmasında təqsirli olan şəxslər qanunla müəyyən edilmiş qaydada məsuliyyət daşıyır, notariat hərəkətlərinin aparılması ilə əlaqədar notariusa qarşı cinayət işi qaldırıldıqda isə məhkəmə onu sirri saxlamaq vəzifəsindən azad edə bilər (Notariat haqqında Qanun, maddə 32).