Konstitusiya qanunu

Konstitusiya qanunu — qanunvericilikdə tərifi

V. Konstitusiya qanunları Azərbaycan Respublikası Konstitusiyasının ayrılmaz hissəsidir və Azərbaycan Respublikası Konstitusiyasının əsas mətninə zidd olmamalıdır.

Konstitusiya qanunu nə deməkdir?

Konstitusiya qanunu Milli Məclisin qəbul etdiyi aktların xüsusi növüdür (Konstitusiya, maddə 93). Konstitusiyaya əlavələr məhz Konstitusiya qanunları şəklində qəbul edilir: bunun üçün 95 səs çoxluğu və 6 ay fasilə ilə iki dəfə səsvermə tələb olunur (Konstitusiya, maddə 156). Konstitusiya qanunları Konstitusiyanın ayrılmaz hissəsidir, lakin onun əsas mətninə zidd olmamalıdır.

Konstitusiya qanunları Prezident tərəfindən imzalanmazsa, qüvvəyə minmir (Konstitusiya, maddə 110). Konstitusiya bir sıra məsələlərin məhz bu formada tənzimlənməsini tələb edir, məsələn, dövlət bayrağının və gerbinin təsviri, himnin musiqisi və mətni (Konstitusiya, maddə 23), normativ hüquqi aktların dərc edilməsi qaydası (Konstitusiya, maddə 149) və Naxçıvan Muxtar Respublikasının Konstitusiyasının təsdiqi (Konstitusiya, maddə 134). Normativ hüquqi aktlar haqqında Konstitusiya Qanunu da bu növə aiddir.