İlkin müqavilə

İlkin müqavilə — qanunvericilikdə tərifi

402.1. İlkin müqaviləyə görə tərəflər həmin müqavilədə nəzərdə tutulmuş şərtlərlə əmlakın verilməsi, işlərin görülməsi və ya xidmətlərin göstərilməsi barədə gələcəkdə müqavilə (əsas müqavilə) bağlamağı öhdələrinə götürürlər.

İlkin müqavilə nə deməkdir?

İlkin müqavilə hələ əmlakın verilməsi, işlərin görülməsi və ya xidmətlərin göstərilməsi öhdəliyi yaratmır: onun predmeti gələcəkdə əsas müqavilənin bağlanmasıdır. Buna görə ilkin müqavilədə əsas müqavilənin predmetini və digər mühüm şərtlərini müəyyənləşdirməyə imkan verən şərtlər göstərilməlidir (Mülki Məcəllə, maddə 402.3). İlkin müqavilə əsas müqavilə üçün nəzərdə tutulmuş formada bağlanır, bu formaya əməl edilməməsi isə onu əhəmiyyətsiz edir (Mülki Məcəllə, maddə 402.2).

İlkin müqavilədə əsas müqavilənin hansı müddətdə bağlanacağı göstərilir; müddət müəyyənləşdirilməyibsə, əsas müqavilə ilkin müqavilənin bağlandığı andan bir il ərzində bağlanmalıdır (Mülki Məcəllə, maddə 402.4). Əsas müqavilə bu müddət qurtarana qədər bağlanmazsa və ya tərəflərdən biri digərinə onu bağlamaq barədə təklif göndərməzsə, ilkin müqavilədə nəzərdə tutulmuş öhdəliklərə xitam verilir (Mülki Məcəllə, maddə 402.5). Niyyət razılaşması (niyyət protokolu) isə tərəflərin ona ilkin müqavilə qüvvəsi vermək iradəsi birbaşa ifadə olunmayıbsa, mülki hüquq nəticələri doğurmur (Mülki Məcəllə, maddə 402.6).