Dəniz sığorta müqaviləsi

Dəniz sığorta müqaviləsi — qanunvericilikdə tərifi

Dəniz sığorta müqaviləsinə görə sığortaçı şərtləşdirilmiş haqq (sığorta mükafatı) müqabilində sığortalıya və ya xeyrinə sığorta müqaviləsi bağlanmış başqa şəxsə (faydalanan şəxs) müqavilədə nəzərdə tutulan hadisələrin (sığorta hadisələrinin) baş verdiyi təqdirdə sığortalanmış obyektə vurulmuş zərərin əvəzini müqavilə ilə müəyyənləşdirilmiş məbləğ (sığorta məbləği) həddində ödəməyi (sığorta ödənişi verməyi) öhdəsinə götürür. Dəniz sığorta müqaviləsi yazılı formada bağlanır.

Dəniz sığorta müqaviləsi nə deməkdir?

Dəniz sığortası ticarət gəmiçiliyi ilə bağlı əmlak mənafelərini qoruyur. Ticarət gəmiçiliyi ilə bağlı hər hansı əmlak mənafeyi, o cümlədən gəmi, inşa edilən gəmi, yük, fraxt, sərnişinin gediş haqqı, yükdən gözlənilən mənfəət, gəmi heyətinin əmək haqları, habelə gəmi sahibinin və sığortaçının öz üzərinə götürdüyü risk (təkrar sığorta) sığortanın obyekti ola bilər; obyekt müqavilədə göstərilməlidir (Ticarət Gəmiçiliyi Məcəlləsi, maddə 195). Sığortaçı müqavilənin bağlandığını təsdiq edən sığorta şəhadətnaməsini və ya digər sığorta sənədini sığortalıya təqdim edir (Ticarət Gəmiçiliyi Məcəlləsi, maddə 197).

Müqavilə bağlanarkən sığortalı riskin dərəcəsini müəyyənləşdirmək üçün mühüm əhəmiyyəti olan halları sığortaçıya bildirməlidir; bunu etmədikdə və ya yanlış məlumat verdikdə sığortaçı müqavilədən imtina edə bilər (Ticarət Gəmiçiliyi Məcəlləsi, maddə 196.3). Dəniz sığortası haqqında fəslin qaydaları tərəflərin başqa razılaşması olmadıqda tətbiq edilir (Ticarət Gəmiçiliyi Məcəlləsi, maddə 194).