Müqavilənin standart şərtləri

Müqavilənin standart şərtləri — qanunvericilikdə tərifi

417.1. Müqavilənin standart şərtləri əvvəlcədən ifadə edilmiş, dəfələrlə istifadə üçün nəzərdə tutulan elə şərtlərdir ki, bunları bir tərəf (təklif edən) digər tərəfə təqdim edir və əvvəlcədən müəyyənləşdirilmiş normalardan fərqlənən və bu normaları tamamlayan qaydalar onların vasitəsilə müəyyənləşdirilir.

Müqavilənin standart şərtləri nə deməkdir?

Standart şərtlər əvvəlcədən ifadə edilir və bir dəfə üçün deyil, dəfələrlə istifadə üçün nəzərdə tutulur: onları bir tərəf (təklif edən) hazırlayır və digər tərəfə təqdim edir. Tərəflər müqavilənin şərtlərini müfəssəl şəkildə özləri müəyyənləşdiriblərsə, bunlar standart şərtlər sayılmır (Mülki Məcəllə, maddə 417.2). Tərəflərin bilavasitə razılaşdırdıqları şərtlərə isə standart şərtlərə nisbətən üstünlük verilir (Mülki Məcəllə, maddə 417.3).

Standart şərtlər müqavilənin tərkib hissəsinə yalnız o halda çevrilir ki, təklif edən tərəf müqavilənin bağlandığı yerdə əyani qeyd yazaraq bu şərtlərə istinad etsin, digər tərəf isə onlarla tanış olmaq və razı olduqda onları qəbul etmək imkanına malik olsun (Mülki Məcəllə, maddə 418.1). Formaca qeyri-adi olduğuna görə digər tərəfin nəzərdə tuta bilmədiyi müddəalar müqaviləyə daxil olmur (Mülki Məcəllə, maddə 419.1). Standart şərtlərdəki bütün qeyri-müəyyənliklər onları təklif etmiş tərəfin əleyhinə təfsir edilir (Mülki Məcəllə, maddə 419.2).