Əqd

Əqd — qanunvericilikdə tərifi

324.1. Əqd mülki hüquq münasibətinin əmələ gəlməsinə, dəyişdirilməsinə və ya xitamına yönəldilmiş birtərəfli, ikitərəfli və ya çoxtərəfli iradə ifadəsidir.

Əqd nə deməkdir?

Əqd mülki hüquq və vəzifələrin yaranmasının əsas vasitəsidir: hər bir müqavilə, o cümlədən alqı-satqı və ya bağışlama da əqddir. Əqdin əsasını iradə ifadəsi təşkil edir; onun həqiqi məzmunu təkcə sözlərin hərfi mənasına görə deyil, ağlabatan mühakimə əsasında da müəyyən edilir (Mülki Məcəllə, maddə 324.5). İradənin məzmunu nə zahiri ifadəyə, nə də başqa hallara görə dəqiq müəyyən edilə bilmirsə, əqd mövcud deyil (Mülki Məcəllə, maddə 324.6).

Əqdlər birtərəfli və müqavilə şəklində olur (Mülki Məcəllə, maddə 324.2). Birtərəfli əqd üçün bir tərəfin iradə ifadəsi kifayətdir, müqavilə üçün isə iki və ya daha çox tərəfin razılaşdırılmış iradə ifadəsi zəruridir (Mülki Məcəllə, maddə 324.4). Əqd şifahi və ya yazılı — sadə və ya notarial — formada bağlanır (Mülki Məcəllə, maddə 329.2); Məcəllədə müəyyənləşdirilmiş şərtlər pozulduqda isə etibarsızdır (Mülki Məcəllə, maddə 337.1).