Bərabər seçki hüququ

Bərabər seçki hüququ — qanunvericilikdə tərifi

4.1. Vətəndaşlar seçkilərdə və referendumda bərabər əsaslarla iştirak edirlər.

4.2. Hər bir səsvermə zamanı hər bir vətəndaşın bir səsi vardır.

4.3. Vətəndaşların hər bir səsi eyni hüquqi qüvvəyə malikdir.

Bərabər seçki hüququ nə deməkdir?

Bərabərlik prinsipi seçicilərin seçkilərdə və referendumda eyni əsaslarla iştirakını təmin edir: heç bir seçicinin səsi digərindən üstün sayılmır. Bələdiyyə seçkiləri istisna olmaqla, seçici yalnız bir namizədin lehinə səs verə bilər (Seçki Məcəlləsi, maddə 10.1), referendumda isə hər suala bir cavab verir (Seçki Məcəlləsi, maddə 10.2).

Prinsip seçki dairələrinin yaradılmasında da tətbiq olunur. Dairələrdə qeydə alınmış seçicilərin sayı təqribən bərabər olmalı, orta təmsilçilik normasından fərq, bir qayda olaraq, 5 faizdən, yolu çətin və ucqar yerlərdə isə 10 faizdən çox olmamalıdır (Seçki Məcəlləsi, maddə 29.3.1). Hər hansı seçici qrupunun çoxluq təşkil etməsi naminə dairə sərhədlərinin məqsədli şəkildə müəyyən edilməsinə və ya dəyişdirilməsinə yol verilmir (Seçki Məcəlləsi, maddə 29.3.3).