Açıq səhmdar cəmiyyəti

Açıq səhmdar cəmiyyəti — qanunvericilikdə tərifi

99.1. Səhmdar cəmiyyətinin iştirakçıları onlara mənsub səhmləri digər səhmdarların razılığı olmadan özgəninkiləşdirə bildikdə, o, açıq səhmdar cəmiyyəti sayılır. Bu cür səhmdar cəmiyyəti buraxdığı səhmlərə açıq abunə yazılışını və onların sərbəst satışını həyata keçirə bilər.

Açıq səhmdar cəmiyyəti nə deməkdir?

Açıq səhmdar cəmiyyətinin (ASC) əsas əlaməti səhmlərin sərbəst dövriyyəsidir. Bu açıqlıq şəffaflıq tələbi ilə müşayiət olunur: ASC illik hesabatını və maliyyə hesabatlarını (mikro və kiçik sahibkarlıq subyektləri istisna olmaqla), maliyyə göstəricilərini, aidiyyəti şəxslərlə bağlanmış və xüsusi əhəmiyyətli əqdləri, idarəetmə orqanları və dividend siyasəti barədə məlumatları hər il dərc etməlidir (Mülki Məcəllə, maddə 99.2).

Xalis aktivlərinin dəyərinin iyirmi beş faizindən artıq məbləğdə olan əqd xüsusi əhəmiyyətli əqd sayılır və onun bağlanması barədə qərar səhmdarların ümumi yığıncağında qəbul edilir; bu tələb banklara və xarici bankların yerli filiallarına şamil edilmir (Mülki Məcəllə, maddə 99.3). Səhmlərin sərbəst dövriyyəsi ASC-ni səhmləri yalnız təsisçilər və ya qabaqcadan müəyyən edilmiş şəxslər dairəsində yayılan qapalı səhmdar cəmiyyətindən fərqləndirir (Mülki Məcəllə, maddə 100.1).