Təkmil sertifikat

Təkmil sertifikat — qanunvericilikdə tərifi

1.1.12. Təkmil sertifikat – akkreditə edilmiş sertifikat xidmətləri mərkəzi tərəfindən gücləndirilmiş elektron imzanı yoxlama məlumatları barəsində verilən sertifikat; …

Təkmil sertifikat nə deməkdir?

Təkmil sertifikat adi sertifikatdan iki cəhətə görə fərqlənir: onu yalnız akkreditə edilmiş Mərkəz verir və o, gücləndirilmiş elektron imzaya aiddir (Elektron imza və elektron sənəd haqqında Qanun, maddə 1.1.12). Təkmil sertifikat xidməti göstərmək üçün Mərkəz müvafiq icra hakimiyyəti orqanında akkreditədən keçməlidir (Elektron imza və elektron sənəd haqqında Qanun, maddə 9.4), sertifikat almaq istəyən şəxs də akkreditə edilmiş mərkəzə müraciət etməlidir (Elektron imza və elektron sənəd haqqında Qanun, maddə 11.3).

Fiziki şəxsə verilən təkmil sertifikatda adi məlumatlardan əlavə onun təkmil sertifikat olması barədə qeyd, istifadə sahələri və məhdudiyyətləri göstərilir və sertifikat onu verən akkreditə edilmiş Mərkəzin gücləndirilmiş imzası ilə təsdiq edilir (Elektron imza və elektron sənəd haqqında Qanun, maddə 12). Təkmil sertifikatın praktik əhəmiyyəti ondadır ki, sertifikatlaşdırılmış vasitələrlə yaradılmış və qüvvədə olan təkmil sertifikatlı gücləndirilmiş imza, qanunvericilikdə nəzərdə tutulmuş hallar istisna olmaqla, əl imzası ilə bərabər hüquqi qüvvəyə malikdir (Elektron imza və elektron sənəd haqqında Qanun, maddə 3.2).