Gəlir vergisi

Gəlir vergisi — qanunvericilikdə tərifi

96.1. Rezidentlərin gəlirləri üzrə vergitutma obyekti vergi ili üçün rezidentlərin bütün gəliri ilə həmin dövr üçün bu Məcəllə ilə müəyyənləşdirilən gəlirdən çıxılan məbləğ arasındakı fərqdən ibarət olan vergiyə cəlb edilən gəlirdir.

Gəlir vergisi nə deməkdir?

Gəlir vergisi fiziki şəxslərin vergisidir: rezident və qeyri-rezident fiziki şəxslər onun ödəyiciləridir (Vergi Məcəlləsi, maddə 95), vergi isə dövlət vergiləri sırasına daxildir (Vergi Məcəlləsi, maddə 6.1.1). Rezident üçün vergitutma obyekti vergi ili ərzində əldə edilmiş bütün gəlir ilə Məcəllədə nəzərdə tutulan gəlirdən çıxılan məbləğ arasındakı fərqdir; ödəmə mənbəyində vergi tutulduqda obyekt vergiyə cəlb olunan gəlirdir (Vergi Məcəlləsi, maddə 96.1).

Rezidentin gəlirinə Azərbaycanda və onun hüdudlarından kənarda əldə edilən gəlir, qeyri-rezidentin gəlirinə isə yalnız Azərbaycan mənbələrindən əldə edilən gəlir aiddir (Vergi Məcəlləsi, maddə 97). Muzdlu işdən aylıq gəlirə ümumi qaydada 2500 manatadək 14 faiz, ondan çox olan hissəyə isə 25 faiz dərəcəsi tətbiq edilir (Vergi Məcəlləsi, maddə 101.1); neft-qaz sahəsində fəaliyyəti olmayan qeyri-dövlət sektorunda çalışanlar üçün Məcəllə ayrıca, mərhələli dərəcələr müəyyən edir (Vergi Məcəlləsi, maddə 101.1-1).