Bazar qiyməti

Bazar qiyməti — qanunvericilikdə tərifi

14.1. Bazar qiyməti malın (işin, xidmətin) tələblə təklifin qarşılıqlı təsiri nəticəsində təşəkkül tapan qiyməti deməkdir.

Bazar qiyməti nə deməkdir?

Ümumi qaydaya görə vergitutma məqsədləri üçün tərəflərin əqddə təsbit etdikləri qiymət qəbul edilir və əks hal sübuta yetirilməyənədək bu qiymət bazar qiyməti sayılır (Vergi Məcəlləsi, maddə 14.2). Vergilər bazar qiyməti nəzərə alınmaqla yalnız Məcəllədə göstərilən hallarda hesablana bilər: barter və idxal-ixrac əməliyyatlarında, qarşılıqlı asılı şəxslər arasında əqdlərdə, qiymətlərin bazar səviyyəsindən topdansatışda 10, tikinti və istehsalda 20, digər sahələrdə 30 faizdən çox fərqləndiyi və Məcəllədə sadalanan digər hallarda (Vergi Məcəlləsi, maddə 14.3).

Bazar qiyməti malın təqdim edildiyi andan çoxu 30 gün əvvəl və ya sonra ən yaxın tarixdə analoji mal üçün əməliyyatlarda təşəkkül tapan qiymətlərə əsasən müəyyənləşdirilir (Vergi Məcəlləsi, maddə 14.4). Bu zaman malların həcmi, ödəniş şərtləri, tələbin mövsümi dəyişməsi, mənşə ölkəsi və keyfiyyəti kimi amillər nəzərə alınır (Vergi Məcəlləsi, maddə 14.6.1).